بیرلشگن ملتلر تشکیلاتینینگ ترقیات دستوری افغانستان بۉیلب ایشانچلی برق انرژیسیدن فایدهلنیش امکانیتی هنوزگچه ساغلیقنی سقلش، تعلیم، تیریکچیلیک و محلي اقتصادي اۉسیشگه تأثیر کۉرسهتهیاتگن اېنگ کتّه معمالردن بیری بۉلیب قالهیاتگنینی ایتدی.
اوشبو تشکیلات گزارشیده ایتیلیشیچه، اهالینینگ قریب ۴۲-۴۰ فایزی ملي برق ترماغیدن فایدهلنیش امکانیتیگه اېگه بۉلسه-ده، بو امکانیتلر نینگ قریب۹۰ فایزی شهرلرده جمعلنگن. قیشلاق اهالیسی اېسه هنوزگچه برق خدمتلریدن کتّه درجهده محروم.
حاضرده افغانستان برق انرژیسینی قۉشنی دولتلردن صادر قیلماقده. صادر قیلینهیاتگن برق انرژیسی هم چېکلنگن بۉلیب، ییریک شهرلرده، جملهدن، برق تأمیناتیده جدّي تنقیصلیک کوزهتیلماقده.
تشکیلات ملي برق ترماغینی آلیس حدودلرگچه کېنگهیتیریش جوده قیین اېکنینی، شو سببلی مرکزلشمهگن قَیته تیکلنووچی انرژی منبعلری اېنگ عملي و برقرار یېچیملردن بیری حسابلنیشینی تأکیدلهدی.
تشکیلات افغانستان بۉیلب مکتبلر و طبیات مرکزلریگه قویاش انرژیسی تیزیملرینی اۉرنهتیش آرقهلی قَیته تیکلنووچی انرژی لایحهلرینی عملگه آشیریشنی باشلهگنینی معلوم قیلدی.
تشکیلات حساباتیده اېنگ سېزیلرلی اۉزگریشلردن بیری عیاللر بازارلریده قویاش انرژیسیدن فایدهلنیش بۉلگنی قید اېتیلگن.
تشکیلات نینگ ایتیشیچه، قویاش پنېللری و برق انرژیسینی بطریلرده سقلش تیزیملری اۉرنهتیلگچ، عیال تدبیرکارلر اۉز بیزنسلرینی اوزاقراق وقت دوامیده آچیق سقلش، یخشیراق ایش شرایطلریگه اېگه بۉلیش و برق تأمیناتی اوزیلگن پیتلرده هم اقتصادي فعالیتینی دوام اېتتیریش امکانیتیگه اېگه بۉلگن.
تشکیلات حساباتیده قید اېتیلیشیچه، بوگونگی کونده قویاش انرژیسی افغانستانده توب اۉزگریشلرنی یوزهگه کېلتیرماقده. تشکیلاتگه کۉره، قویاش انرژیسی ساغلیقنی سقلش و تعلیم کبی اساسي خدمتلرنی یخشیلش، بندلیک و تیریکچیلیکنی قۉللب-قوّتلش، عیاللرنی امکانیتلرینی کېنگهیتیریش همده افغانستاننی فقط چیدملیلیک باسقیچیدن تیکلنیش و اقتصادي رواجلنیش سری آلیب باریشگه یاردم بېرماقده.
