امریکا قۉشمه ایالتلرینینگ مالیه وزیری اسکات بسنت، بوگون اېرتهلب (دوشنبه، ۲-سنبله) ایرانگه قرشی تاریخدهگی اېنگ ییریک اقتصادي عملیات باشلنیشینی ایتدی.
اسکات بسنت «فایننشال تایمز» گزیتهسیده چاپ اېتیلگن مقالهسیده دوشنبه کونی قویاش چیقیشی بیلن «اقتصادي کون» باشلنیشینی یازگن.
اونینگ ایتیشیچه، بو عملیات «دشمنگه قرشی اېنگ ییریک مالی هجوم» بۉلیب، بونگه اۉخشش حالت ایلگری کوزهتیلمهگن.
اسکات بسنت انیق چارهلرنی باتفصیل بیان قیلمهگن حالده، ایران اقتصادی و مالی تیزیمی بیلن همکارلیک قیلیب، اونی «قۉللب-قوّتلهیاتگن» «قۉرقاق دولتلر» هم نشانگه آلینیشینی معلوم قیلگن.
او ایران نینگ سودا همکارلرینی آگاهلنتیریب، «بو حالتنی دوام اېتتیریش عاقبتلرینی اۉیلب کۉرگنلری معقول»، دېگن.
بونگه جوابن ایران «اقتصادي اوروش دوام اېتسه»، فارس کۉرفزیدن برچه نفت اېکسپورتینی تۉختهتیشینی وعده قیلگن.
سۉنگگی ایکّی هفته دوامیده امریکا قۉشمه ایالتلری جمهور رییسی دونالد ترامپ ایرانگه قرشی تاریخدهگی اېنگ ییریک اقتصادي عملیاتلر باشلنیشی حقیده بیر نېچه بار گپیرگن.
ترامپنینگ ایتیشیچه، اوشبو عملیات دایرهسیده برچه دولتلرگه ایران بیلن هر قندهی اقتصادي علاقهنی عملگه آشیریش تعقیقلنهدی. ایران بیلن مالیوي و سودا همکارلیگی قیلگن هر قندهی دولت امریکا تامانیدن چېکلاولر و یوقاری باج تعرفهلریگه دوچ کېلهدی.
بونگه قرشی ایران اوشبو اقتصادي عملیات نینگ باشلنیشینی حربي اوروش صفتیده بهالشینی و بونگه جوابن فارس کۉرفزیدن نفت و گاز اېکسپورتینی تۉلیق تۉختهتیشینی بیلدیرگن.
ایران ملي خوفسیزلیک عالي کېنگشی سۉزلاوچیسی محسن رضوی ایکس ده اعلان قیلگن بیاناتیده شوندهی دېدی: «اگر اقتصادي اوروش دوام اېتسه، نه هرمز بۉغازی آرقهلی، نه فارس کۉرفزی نینگ باشقه هېچ بیر جاییدن بیر تامچی هم نفت اېکسپورت قیلینمهیدی.»
او، شونینگدېک، امریکانینگ ایران خلقیگه قرشی آلیب بارهیاتگن اقتصادي اوروشیده اشتراک اېتگن یاکه اونی قۉللب-قوّتلهگن هر قندهی دولت نینگ حرکتینی «اوروش حرکتی» دېب بهالشینی قۉشیمچه قیلگن.
