طالبلرنینگ بامياندهگی سابق والیسی عبدالله سرحدی، اوشبو گروهنینگ افغانستاندهگی بیرینچی حکمرانلیگی دوریده تاریخي بودا هیکللرینی ویران قیلگنینی تن آلدی.
او بیبیسی جهان خدمتیگه بېرگن صحبتیده : «مېن اولرنی اۉز قۉللریم بیلن ویران قیلگنمن»، دېدی.
عبدالله سرحدی قۉشیمچه قیلدی: «بیز قیلگن و قیلهیاتگن برچه ایشلر خدانینگ کۉرستمهسی و قانونیگه موافقدیر… بیز بوتلرنی ساتمهیمیز، بلکه اولرنی سیندیرهمیز.»
طالبلرنینگ بامياندهگی سابق والیسی تاریخي بودا هیکللرینینگ ویران قیلینیشیدن افسوسلنمسلیگینی ایتیب: «نېگه افسوسلنیشیم کېرهک؟ بو خدا نینگ خواهشی اېدی»، دېدی.
طالبان ۲۰۰۱-ییل ۱۱-مارچ کونی اوشبو گروه نینگ سابق رهبری ملا محمد عمر نینگ بویروغی بیلن بامياندهگی اولکن بودا هیکللرینی پارتلاوچی مادّهلر قۉییش همده تۉپ و تانکلردن اۉق اوزیش آرقهلی ویران قیلگن.
اۉشه پیتده طالبلرنینگ حربي قوماندانلریدن بیری بۉلگن عبدالله سرحدی اېندی اوشبو تاریخي هیکللرنی ویران قیلیشده اشتراک اېتگنینی تن آلدی.
باميان ولایتیده افغانستان مرکزیده تاغنی اۉییب، مخصوص اسلوبده یرهتیلگن۵۳ متر بلندلیکدهگی سلسال و۳۵ متر بلندلیکدهگی شهمامه هیکللری میلادي ۳۰۰–۷۰۰-ییللر آرهلیغیده بنیاد اېتیلگن.
یونېسکونینگ تاریخي مراث رۉیخطیگه هم کیریتیلگن اوشبو هیکللرنینگ ویران قیلینیشی خلقارا مقیاسده کېنگ قارهلنگن و کېسکین ناراضیلیکلرگه سبب بۉلگن.
طالبلر افغانستاده ینه حاکمیتنی قۉلگه کیریتگنیدن سۉنگ، عبدالله سرحدی اوشبو گروه تامانیدن باميان ولایتیگه حاکم اېتیب تعیینلنگن و ۱۴۰۴-ییل جدی آییگچه اوشبو ولایت حاکمی بۉلگن.
طالبلرنینگ عملدهگی رهبری هبتالله آخوندزاده 1۱۴۰۴-ییل ۱۱-جدی کونی عبدالله سرحدینی باميان حاکمی لوازمیدن آزاد قیلیب، اونی جوزجان ولایتیگه حاکم اېتیب تعیینلهگن. کېینچهلیک اېسه او قندوز ولایتیدهگی «۲۱۷-عمري قول اردو» قوماندانی اۉرینباسری لوازمیگه تعیینلنگن.
