محلي منبعلر طالبلرنینگ عدلیه وزیری عبدالحکیم شرعی بامیان ولایتی طالبلر عدلیه ریاستینینگ هزاره ملتیگه منسوب اوچ نفر خادیمی و بیر نفر خدمت کۉرسهتووچی ایشچیسینی ایشدن بۉشهتیب، اۉزی نینگ «شخصي قماقخانهسی»ده سقلهیاتگنینی اَیتماقده.
منبعلرگه کۉره، بو شخصلر شنبه،۳۱-اسد کونیدن بویان طالبان عدلیه وزیری نینگ شخصي قماقخانهسیده سقلنماقده و اولرنینگ تقدیری حقیده حاضرچه هېچ قندهی معلومات یۉق.
منبعلر معلوماتیگه کۉره، بو شخصلر بامیاندهگی طالبلر عدلیه ریاستی باشلیغی باسیمی همده اوشبو ریاست نینگ اداری باشلیغی بیلن یوزهگه کېلگن کېلیشماوچیلیکلر آرتیدن جماعهوي روشده استعفا بېرگن. شوندن سۉنگ اولر طالبلر عدلیه وزیری تامانیدن کابلگه چقیریلگن، وظیفهلریدن چېتلهتیلگن و قماققه آلینگن.
منبعلر حبسگه آلینگن اوچ خادم نینگ اسملری «خانعلی نبیزاده، جواد صمیمی و محمد عزیزی» اېکنینی اَیتماقده. اولر بامیاندهگی طالبلر عدلیه ریاستینینگ بېشینچی و آلتینچی درجهلی لوازملریده ایشلهگن.
منبعلر خبریگه کۉره، طالبلر عدلیه وزیری بو شخصلرنینگ جماعهوي استعفاسینی «بۉیسونمسلیک» و اطاعتسیزلیک صفتیده بهالهگن و شو سببلی اولرنی حبسگه آلدیرگن.
طالبلر عدلیه وزیرلیگی و اونینگ بامیان ولایتیدهگی عدلیه ریاستی حاضرچه بو خادملرنینگ حبسگه آلینگنی حقیده ایضاح بېرمهگن.
طالبلر عدلیه وزیری سۉنگگی ییللرده شخصي قماقخانهگه اېگه اېکنی همده آدملرنی، اینیقسه شیعهلر و هزارهلرنی اۉزباشیمچهلیک بیلن حبسگه آلیب، قماققه تشلهگنی حقیده بیر نېچه بار عیبلنگن.
او جاري ییل محرّم آییده کابل شهرینینگ اَیریم منطقهلریده ماتم بیراقلری اۉرنهتیلگنی سببلی بیر قطار شیعه و هزاره جماعهسی آقسقاللرینی حبسگه آلیب، وقتینچه قماقده سقلهگن اېدی.
طالبلر عدلیه وزیری شیعهلر و هزارهلرگه نسبتاً کمسیتووچی مناسبتده بۉلیشده هم عیبلنگن. جاري ییل اسد آییده بیر گروه شیعه علمالری و جماعه آقسقاللری بیانات نشر قیلیب، بوندهی مناسبتنی «چیدهب بۉلمس» دېب اتهگن.
