«د افغانستان د ژغورنې لپاره د ملي مقاومت عالي شورا» وایي، د طالبانو له خوا د خاتمالنبیین پوهنتون او د هغه د ټولو څانګو د تړلو پرېکړه، سره له دې چې دغه پوهنتون د لوړو زدهکړو وزارت رسمي جواز درلود، «خپلسری اقدام، له هر ډول حقوقي توجیه څخه بېبرخې او له علم، زدهکړو او د اکادمیکو بنسټونو له خپلواکۍ سره د ښکاره دښمنۍ څرګندونه» ده.
دې شورا نن (جمعه، د وږي ۲۷مه) په یوه اعلامیه کې ویلي چې دغه اقدام زرګونه محصلین، استادان او د هغوی کورنۍ زیانمنې کړې دي. د شورا په وینا، دا پرېکړه ښيي چې طالبان د هېواد د علمي پرمختګ پر ځای د افغانستان د تعلیمي، څېړنیزو او فکري بنسټونو د له منځه وړلو پر لور ګامونه اخلي.
«د افغانستان د ژغورنې لپاره د ملي مقاومت عالي شورا» همداراز ویلي چې «د افغانستان له پوهنتونونو څخه د حقوقو او سیاسي علومو د څانګو حذفول، د طالبانو د هغې منظمې تګلارې دوام دی چې موخه یې د لوړو زدهکړو د نظام کمزوري کول، د بشري علومو له منځه وړل، د انتقادي فکر محدودول او د ځوان نسل محرومول له تخصصي زدهکړو څخه په حقوقو، عدالت، حکومتولۍ او سیاست برخو کې دي.»
د دې شورا په وینا، د دغې تګلارې پایله به د قانون حاکمیت کمزوري کېدل، د هېواد د علمي ظرفیتونو کمېدل او افغانستان له حقوقي او سیاسي برخو کې له مسلکي او ژمنو کادرونو څخه محرومېدل وي.
شورا همداراز پر ازادو رسنیو د محدودیتونو زیاتېدل، د خپلواکو رسنیو تړل، د خبریالانو نیول، ګواښل او ډارول، او د سانسور پراخېدل په کلکه غندلي دي. شورا ویلي چې د بیان ازادي او د رسنیو ازادي د ملتونو له بنسټیزو حقونو څخه دي او هغه ډله چې د زور او ځپنې له لارې د منتقدانو غږ خاموشوي، د خلکو په وړاندې له اخلاقي او سیاسي مشروعیت څخه برخمنه نه ده.
«د افغانستان د ژغورنې لپاره د ملي مقاومت عالي شورا» په دوام کې لیکلي چې «طالبانو د تبعیضي او انحصار غوښتونکو سیاستونو له لارې د افغانستان د ټولو وګړو، قومونو او مذهبونو حقونه په پراخه کچه تر پښو لاندې کړي او د هېواد د ادارې له ډګر څخه یې د قومونو، مذهبونو، ملي څېرو او سیاسي ځواکونو په سیستماتیک ډول په ایستلو سره، ملي یووالی، ټولنیز پیوستون او د خلکو باور له جدي ګواښ سره مخ کړی دی.»
دې شورا له ملګرو ملتونو، د بشري حقونو له شورا، د اسلامي همکاریو سازمان، د سیمې او نړۍ له هېوادونو او د بشري حقونو له ټولو نړیوالو بنسټونو غوښتي چې د بشري حقونو د پرلهپسې سرغړونو، د بنسټیزو آزادیو د ځپلو، منظم تبعیض، د علمي او مدني بنسټونو د له منځه وړلو او د طالبانو د استبدادي سیاستونو د دوام پر وړاندې چوپ پاتې نه شي.
شورا له دغو بنسټونو غوښتي چې د ټولو حقوقي، سیاسي او ډیپلوماټیکو لارو چارو په کارولو سره طالبان د افغانستان د خلکو د بنسټیزو حقونو رعایت او حساب ورکولو ته اړ کړي.
«د افغانستان د ژغورنې لپاره د ملي مقاومت عالي شورا» ټینګار کړی چې «افغانستان د ټولو خپلو وګړو ګډ هېواد دی او هېڅ ډله حق نه لري چې د زور، استبداد، انحصار، تبعیض او ځپنې له لارې د یوه ملت برخلیک یرغمل کړي.»
د طالبانو د لوړو زدهکړو وزارت دوه ورځې وړاندې د خاتمالنبیین خصوصي پوهنتون د فعالیت جواز لغوه کړ. له دې وروسته په کابل کې د دغه پوهنتون د ودانۍ او په غزني کې د هغې د نمایندګۍ دروازې وتړل شوې.
د طالبانو د لوړو زدهکړو وزارت ویاند ضیاءالله هاشمي د دغه پوهنتون د جواز د لغوه کېدو دلیل «د وزارت د پالیسۍ نه رعایتول، د اسلامي ارزښتونو سپکاوی او د پوهنتون له حیثیت او مقام څخه ناسمه ګټه اخیستنه» بللې ده.
طالبانو تر دې وړاندې د خاتمالنبیین مدرسه او د تمدن ټلویزیون هم تړلي وو. دغه درې تعلیمي، دیني او فرهنګي بنسټونه د شیعه دیني عالم آیتالله شیخ محمد آصف محسني له خوا جوړ شوي وو او د نوموړي له مړینې وروسته یې د کورنۍ غړو اداره پر مخ وړله.
طالبانو په وروستیو ورځو کې د «راه فردا» خصوصي ټلویزیون خپرونې هم درولې او د دغه ټلویزیون امتیاز خاوند یې نیولی دی. دغه ډلې همداراز یو شمېر شیعه او هزاره بانفوذه کسان، چې د «افغانستان د شیعیانو د عالي شورا» مشر او غړي هم پکې شامل دي، نیولي او زنداني کړي دي.
