د آلمان پولیسو یو ۳۷ کلن افغان وګړی د دغه هېواد په لوېدیځ کې د ووپرتال ښار په یوه یهودي کنیسه کې د اور لګولو د هڅې په تور نیولی دی.
د دویچهوېله د راپور له مخې، دغه سړي پرون له غرمې وروسته (پنجشنبه، د وږي ۲۶مه) په سیمهییز وخت لومړی د یوې یهودي کنیسې پر یوې څنګنۍ دروازې اور اخیستونکي مواد واچول او وروسته یې پرې اور بل کړ.
د دې رسنۍ د راپور له مخې، پولیسو ویلي چې اور د کنیسې د غړو له خوا په چټکۍ سره مړ کړای شو او د پېښې له امله اوښتی زیان لږ و.
د آلمان پولیسو ویلي چې لومړنۍ څېړنې ښيي چې دغه افغان وګړي په یوازې ځان اقدام کړی دی.
د آلمان د یهودانو شورا د دې برید په اړه اندېښنه څرګنده کړې او دا یې په آلمان کې د یهودانو پر وړاندې د کرکې د لا زیاتې عادي کېدو یوه نښه بللې ده.
تر دې مخکې هم په آلمان کې د څو جنایي پېښو مسوولیت پر افغان وګړو ور اچول شوی دی.
د دغو پېښو وروسته، د آلمان حکومت افغانستان ته د «جرم کوونکو مهاجرینو» د بېرته ستنولو لړۍ بیا پیل کړه او په دې اړه یې له طالبانو سره یوې هوکړې ته هم ورسېد.
دغه هېواد تر اوسه سلګونه «جرم کوونکي مهاجرین» افغانستان ته ستانه کړي او هڅه کوي چې د هغوی د ایستلو بهیر لا چټک کړي.
