د طالبانو د اطلاعاتو او کلتور وزارت د ګرځندوی چارو مرستیال، قدرتالله جمال، په کابل کې د قطر له سفیر علي بن مرزوق سره په لیدنه کې له قطره په افغانستان کې د ګرځندوی په برخه کې د همکارۍ غوښتنه کړې ده.
د طالبانو د اطلاعاتو او کلتور وزارت نن (پنجشنبه، د تلې ۲مه) په یوه اعلامیه کې ویلي چې جمال او بن مرزوق په کابل کې سره لیدلي او خبرې یې کړې دي.
په اعلامیه کې راغلي چې د دې لیدنې مهم بحثونه په افغانستان کې د قطري سیلانیانو راجلبول، د افغانستان د طبیعي، تاریخي او ګرځندویزو جاذبو ورپېژندل، قطري پانګهوالو ته په هېواد کې د پانګونې د فرصتونو برابرول او د دواړو هېوادونو ترمنځ د ګرځندوی په برخه کې د رسمي همکاریو لپاره د یوه چوکاټ رامنځته کول وو.
قدرتالله جمال د افغانستان طبیعي ښکلاوو، تاریخي ودانیو، لرغونو سیمو او بېلابېلو ګرځندویزو جاذبو ته په اشارې ویلي چې په افغانستان کې له قطري سیلانیانو او پانګهوالو سره د همکارۍ لپاره مناسب فرصتونه شته.
په کابل کې د قطر سفیر، علي بن مرزوق الشملان القاشوطي، د دواړو هېوادونو ترمنځ د کلتوري اړیکو پر اهمیت ټینګار کړی او ویلي یې دي چې د افغانستان او قطر ترمنځ د اړیکو د لا پراختیا او ګډو همکاریو د پیاوړتیا لپاره «دوامداره تعامل» اړین دی.
طالبانو په ۲۰۰۱ میلادي کال کې په بامیانو کې د بودا هغه مجسمې، چې د افغانستان له مشهورو لرغونو اثارو څخه وې، په چاودنو سره ویجاړې کړې. اوس د صلصال او شهمامې تشې دروازې د طالبانو لپاره د ګرځندوی له صنعت څخه د عوایدو له مهمو سرچینو څخه ګڼل کېږي.
طالبانو په وروستیو کلونو کې هڅه کړې چې د «سراسري امنیت» او «د بهرنیانو د خوندیتوب» د روایت په تبلیغولو سره له بهر څخه سیلانیان افغانستان ته راجلب کړي. خو لا هم د زیربناوو د نامناسب وضعیت او د دې ډلې له لوري د لګېدلو محدودیتونو له امله، په افغانستان کې د ګرځندوی صنعت د جمهوري نظام د دورې په پرتله د پام وړ بدلون نه دی کړی.
له بلې خوا، طالبانو ښځې او کورنۍ په تفریحي او ګرځندویزو ځایونو کې له حضور څخه منع کړې دي. د دې کار له امله کورنی ګرځندوی په څرګند ډول کم شوی دی. په مقابل کې، طالبان له بهرنیو ښځینه سیلانیانو، په ځانګړې توګه له هغو یوټیوبرانو، چې افغانستان د «خوندي» هېواد په توګه معرفي کوي، تود هرکلی کوي.
