طالبلرنینگ ترانسپورت و هوا یۉللر وزیرلیگی مملکت خلق ارا قۉنالغهلریده هوا ترانسپورتی خدمتلری خرجتلری کمهیتیریلگنینی معلوم قیلدی.
افغانستان ترانسپورت و هوا یۉللر وزیرلیگی معلوماتیگه کۉره، هوانوردلیک خوفسیزلیگی تۉلاوی هر بیر تُن یوک اوچون۱۰۰ امریکا دالریدن۱۰ دالرگچه، یېر اوستی خدمتلری (گراند هندلینگ) تۉلاوی اېسه هر بیر تُن اوچون۹۶ دالردن۴۰ دالرگچه کمهیتیریلگن.
طالبلرنینگ ترانسپورت و هوا یۉللر وزیرلیگی هوانوردی عملیاتلری بۉییچه اۉرینباسری فتحالله منصورنینگ ایتیشیچه، بو قرار یوک تشیش خرجتلرینی کمهیتیریش، تدبیرکارلرنی قۉللب-قوّتلش، صادراتنی کوچهیتیریش و افغانستان محصولاتلرینی جهان بازارلریگه یېتکزیشنی مقصد قیلگن.
اونینگ ایتیشیچه، منتظم یوک کارگو خدمتلری اوچون۲۵ فایز، مخصوص یوک کارگولری اوچون اېسه۵۰فایز چېگیرمه بېلگیلنگن.
هوا یۉلکلری افغانستان تاورلرینی اېکسپورت قیلیش یۉللریدن بیری حسابلنهدی و قوروقلیک همده دېنگیز یۉللریگه نسبتاً قیمتراقدیر.
افغانستاننینگ دېنگیزگه تۉغریدن-تۉغری چیقیشی یۉق و او پاکستان همده ایران بندرلریدن فایدهلنهدی.
پاکستان اۉتگن ییلی طالبلر بیلن یوزهگه کېلگن تۉقنهشوولردن سۉنگ افغانستان بیلن چېگرهلرینی یاپگن. ایران یۉنهلیشی اېسه هرمز بۉغازینینگ یاپیلیشی سببلی قیینچیلیکلرگه دوچ کېلماقده.
شونگه قرهمهی، پاکستان چېگرهلرینینگ یاپیلیشی، یقین شرقدهگی کېسکینلیک و هرمز بۉغازینینگ یاپیلیشی افغانستاننینگ ضعیف اقتصادیگه تأثیر کۉرسهتیب، مملکتده تاورلر و خاماشیا نرخلرینینگ آشیشیگه سبب بۉلماقده.
