ایران تشقی ایشلر وزیری عباس عراقچی قطر باش وزیری و تشقی ایشلر وزیری محمد بن عبدالرحمن آل ثانی بیلن اوچرهشوودن سۉنگ «دیپلوماتيکنی اۉز یۉلیگه قَیتریش امکانسیز اېمس»لیگینی ایتدی.
ایران تشقی ایشلر وزیری بوگون (جمعه، ۶-سنبله) ایکسدهگی صحیفهسیده شوندهی یازدی: «بونینگ اوچون امریکا عادي بیر حقیقتنی انگلب یېتیشی کېرهک: باسیم نتیجه بېرمهیدی.»
اونینگ قۉشیمچه قیلیشیچه: «امریکا ایشانچنی تیکلشی، حرمت بیلن گپیریشی، بیزنینگ حقوقلریمیزنی تن آلیشی و اۉز مجبوريتلریگه عمل قیلیشی کېرهک.»
قطر باش وزیری و تشقی ایشلر وزیری کېچه هیئتگه باشچیلیک قیلیب تهرانگه تشریف بویوردی. او ایراننینگ یوقاری مرتبهلی رسميلری، جملهدن، جمهور رییس مسعود پزشکيان، پارلمان رئیسی محمد باقیر قالیباف و تشقی ایشلر وزیری عباس عراقچی بیلن اوچرهشیب، مذاکرهلر اۉتکزدی.
قطر تشقی ایشلر وزیرلیگی اوشبو اوچرهشوولرده منطقهدهگی سۉنگگی واقعهلر همده «منطقه خوفسیزلیگی و برقرارلیگینی مستحکملشگه خدمت قیلهدیگن ملاقات اوچون قولهی شرط-شرایط یرهتیش» مسألهلری محاکمه قیلینگنینی معلوم قیلدی.
قطر پاکستان بیلن بیرگهلیکده ایران و امریکانی مذاکره چوکییگه قَیتریش، کېلیشماوچیلیکلرنی حل قیلیش همده هرمز بۉغازینی قَیته آچیش بۉییچه مذاکرهلرنی تیکلشگه حرکت قیلماقده.
ایران و امریکا جاري هجري-شمسي ییل نینگ جوزا آییده پاکستان واسطهچیلیگیده اوروشنی توگهتیش بۉییچه کېلیشوونی امضالهگن اېدی. بیراق آرهدن قریب بیر هفته اۉتیب، تامانلر بیر-بیرینی اوشبو کېلیشوونی بوزگنلیکده عیبلب، تۉقنهشوولرنی قَیته باشلهگن.
حاضرده ایکّی دولت اۉرتهسیدهگی تۉقنهشوولر تۉختهگن، بیراق امریکا ایرانگه قرشی اقتصادي چېکلاولرینی کوچهیتیرگن. ایران اېسه هرمز بۉغازی هنوز یاپیق اېکنینی بیلدیرماقده.
