«افغانستان اوروشی کمیسیونی» اوشبو کمیسیوننینگ ماموریتی امریکا کانگرسی تامانیدن ینه بیر ییلگه اوزهیتیریلگنینی معلوم قیلدی.
کمیسیون نینگ مشترک رئیسلری شمیلا چودری و کالین اف جکسون بیاناتیده ایتیشیچه، شو طریقه کمیسیوننینگ افغانستاندهگی اوروش بۉییچه یکوني گزارشینی تقدیم اېتیش مدتی ۲۰۲۷-ییل اگوستیگچه اوزهیتیریلگن.
اولرنینگ قۉشیمچه قیلیشیچه: «کانگرس رهبرلری وکیللر اعضاسی و سنادهگی تېگیشلی کمیتهلر همده هر ایکّی حزب وکیللری تامانیدن کمیسیوننینگ ماموریتلرینی اوزهیتیریشنی اونینگ تشکیل اېتیلیشی و وکالتلرینی بېلگیلاوچی قانونده نظرده توتیلگن ترتیب آرقهلی معقولهدیلر.»
اولرنینگ ایتیشیچه، بو اوزهیتیریش امریکانینگ افغانستاندهگی۲۰ ییللیک اوروشینی هر تامانلهمه، مستقل و انیق بهالشنی یکونلش اوچون ضرور قۉشیمچه وقتنی تأمینلهیدی.
«افغانستان اوروشی کمیسیونی» رهبرلری وکالت مدتی نینگ اوزهیتیریلیشی کمیسیونگه تدقیقات جریانینی ینهده چوقورلشتیریش، قالگن مهم تدقیقاتلرنی یکونلش و یکوني حساباتده پُخته اۉرگنیلگن همده دلیللرگه اساسلنگن خلاصهلر و توصیهلر عکس اېتیشینی تأمینلش امکانینی بېریشینی ایتگن.
«افغانستان اوروشی کمیسیونی» امریکا کانگرسی تامانیدن ۲۰۲۱-ییل دسامبر آییده تشکیل اېتیلگن.
کانگرس اوشبو مستقل و ایکّی حزبلی کمیسیونگه امریکا نینگ افغانستاندهگی۲۰ ییللیک اوروشینی هر تامانلهمه اۉرگنیش، اوشبو تحلیلدن آلینگن سبقلرنی انیقلش همده کېلهجک اوچون توصیهلر ایشلب چیقیش وظیفهسینی یوکلهگن.
