آلمان یېتکرمهلری طالبلرنینگ اوچ کیشیدن عبارت هیئاتی رسمي اعلان قیلمسدن آلمانگه تشریف بویورگنی حقیده خبر بېردی.
«تاگسشاو» نشری «اندیآر» تلویزیونیگه تهیهنیب خبر بېریشیچه، طالبلر هیئاتی اۉتگن هفته چهارشنبه کونی (۴-سنبله) قطرده تۉختهب اۉتگنیدن سۉنگ آلمانگه کیریب کېلگن.
خبرگه کۉره، طالبلر هیئاتی اعضالری بیر آیلیک ویزهلر بیلن آلمانگه کیرگن و مملکتده قریب اوچ هفته قالیشی کوتیلماقده.
طالبلر حاضرچه بو بارهده ایضاح بېرمهگن بۉلسه-ده، آلمان یېتکرمهلری هیئت «مهاجرلرنی دېپورت قیلیشنی آسانلشتیریش» مقصدیده، دېپورت رۉیخطیدهگی مهاجرلرنینگ شخصینی انیقلشگه یاردم بېریش اوچون آلمانگه کېلگنینی یازگن.
طالبلر هیئاتی حاضرده برلیندهگی افغانستان اېلچیخانهسیده استقامت قیلماقده. کېلهسی هفته هیئت اعضالری بن و مونیخ شهرلریدهگی افغانستان قنسوللیکلریگه باریشی رېجهلشتیریلگن.
آلمان تشقی ایشلر وزیرلیگی طالبان اعضالری مملکتگه «تخنیکي کمک گروهی» صفتیده و «وقتینچه» کیرگنینی معلوم قیلگن.
آلمان طالبان بیلن علاقهلر اۉرنهتگنیدن سۉنگ افغانستانگه دېپورتلرنی قَیته باشلهگن. آلمان۲۰۲۴-ییل اگستیدن بویان۱۴ ته پرواز آرقهلی جمعی۲۵۶ کیشینی افغانستانگه دېپورت قیلگن.
بو شخصلر جنسي تجاوز، قاتللیک، ملي خوفسیزلیککه تهدید و گیاهوند مادّهلر بیلن باغلیق آغیر جنایتلرده عیبدار دېب تاپیلگن اېدی.
