محلي منبعلر «اطلاعات روز» گزیتهسیگه بېرگن معلوماتیده ایتیشیچه، طالبان پنجشیر ولایتی عنابه اولسواللیگینینگ «آبدره» منطقهسیده یشاوچی قریب۳۰ کیشینی حبسگه آلگن.
منبعلرگه کۉره، اوشبو محلي یشاوچیلر سهشنبه کونی (۳-سنبله) شام نمازی وقتیده مسجد ایچیدن حبسگه آلینگن.
منبعلرنینگ ایتیشیچه، آدملر نماز صفیده تورگن پیتده پارتلش یوز بېرگن، شوندن سۉنگ طالبلر کوچلری هواگه قرهته اۉق اوزگن.
محلي اهالی وکیللری طالبان کوچلرینینگ اۉزلری ماین پارتلهتگنینی اَیتماقده.
بیراق طالبلر پارتلش و هواگه قرهته اۉق اوزیشلردن سۉنگ مسجدگه باستیریب کیریب، قریب۳۰نفر نمازخواننی اۉز قرارگاهیگه هجوم قیلگنلیکده عیبلب، حبسگه آلیب کېتگن.
«اطلاعات روز» منبعلرینینگ ایتیشیچه، حبسگه آلینگنلر آرهدن بېش کون اۉتگنیگه قرهمهی، همان طالبان قۉلیده سقلنماقده.
منبعلرگه کۉره، اوشبو حدود «افغانستان ملي مقاومت جبههسی» نینگ هلاک بۉلگن قوماندانی «حسیب پنجشیری» نینگ توغیلگن جایی حسابلنهدی. محلي اهالی عامهوي حبسگه آلیشلردن بیر کون آلدین «زمانکور» حدودیده اونینگ دفن مراسمیده قتنهشگن.
طالبان تامانیدن سَالنگده اۉلدیریلگن «افغانستان ملي مقاومت جبههسی» قوماندانلریدن بیری بۉلگن حسیب پنجشېري دوشنبه کونی (۲-سنبله) پنجشېر ولایتینینگ عنابه تومنیدهگی زمانکور حدودیده کوچلی حربي خوفسیزلیک چارهلری آستیده دفن اېتیلگن.
