گزارشگر: اسلامالدین جرأت
دوکاننینگ آرقه اېشیگی یاپیق اېدی. تشقریدن او یېرده کیمدیر بارلیگی بیلینمسدی. اېشیک آلدیده اون سالینگن پلاستیک خلتهلر تېریب قۉییلگندی؛ ساتیش اوچون اېمس، نیمهنیدیر یشیریش اوچون.
بیر نېچه ییلدن بېری غنیگلنینگ دوکانیدن خرید قیلهمن – گوروچ، اون، یاغ و شکر. اونینگ دوکانی پېشاوردهگی بارد بازاریده جایلشگن. او اۉتّیز ییل اوّل بغلان ولایتیدن کېلیب، شو یېرده قالگن. بو سفر بارگنیمده، دخل آرتیده بیر پاکستانلیک اېرکک تورردی. نرخلرنی بیلمسدی. هر سفر مشتری بیرار نرسه سۉرهسه، تېلفون قیلیب سۉرردی. غنیگل بیلن حساب-کتابلریم توگللنمهگنینی ایتدیم. او مېنینگ کۉپ ییللیک مشتری اېکنیمنی بیلگچ، آرقه اېشیک آلدیدهگی اون خلتهلرینی چېتگه سوریب، مېنی دوکان نینگ ایچکری خانهسیگه تکلیف قیلدی.
خانه کیچکینه اېدی. خانه نینگ اۉرتهسیده بیر پول پکه تیترهب تورردی؛ پرّکلری تۉغری ایلنمسدی. خانهنینگ بیر چېتیده نمازگاه یاتردی. کیچکینه چوکی اوستیده بیر نېچته دفتر، خودکار قلم و ماشین حساب بار اېدی.
غنیگل اېلّیک یاشده. پېشانهسیده تېر پیدا بۉلگن اېدی. قۉلیده بیر گیلاس چای بار اېدی. سقالی بیر نېچه کونلیک اېدی، عادتدهگیدېک تازه قیریب یورمسدی. کۉیلهگی نینگ ایکّی-اوچ توگمهسی آچیق اېدی. او آلدیمگه یشیل چای سالینگن ترموزنی قۉیدی.
-بو ایسّیقده؟ – دېدیم.
-ایسّیقنی ایسّیق کېتکزهدی، – دېدی او.
قنچه قرضیم بارلیگینی سۉرهدیم. او دفترلرنی بیرمه-بیر ورقلهدی. خودکار قلمنی آلیب، بیر نېچته رقمنی قۉشدی و ماشین حسابنی چوکی اوستیگه قۉیدی. کېین مېنینگ حساب-کتابلریمنی چېتگه سوریب، اۉغلی حقیده گپیردی.
8-جولای کونی اونینگ یاش اۉغلی دوکاندن آلیب کېتیلگن اېدی. غنیگل ساعت اوچلرده تېلفون آرقهلی اونینگ حبسگه آلینگنی حقیده خبر آلگن. آرهدن سکّیز ساعت اۉتیب، اۉغلی تورخده اېدی. غنیگل اۉشه کونی دوکانینی اېرته یاپگن.
اۉغلی نینگ پیاوآرکارتی بار اېدی؛ غنیگل نینگ اۉزیده هم ییللر دوامیده شوندهی کارت بۉلگن. اما حاضر اۉغلی افغانستانده، غنیگل اېسه بارد بازاریده، بیر قِسمی اون خلتهلری بیلن تۉسیب قۉییلگن اېشیک آرتیده قالگن اېدی. اونینگ ایتیشیچه، اۉغلی کابلدن اجارهگه اوی قیدیرماقده. بیر هفته اۉتگن، اما حلی اوی تاپالمهگن. اونینگ ایتیشیچه، مهاجرلر نینگ قَیتیشی کابلده اوی تاپیشنی قیینلشتیرگن.
اۉغلیدن کېین او دوکان و قَیتیش قراری حقیده گپیردی. قطعي قرار قیلگن. البته، بوگوناق اېمس. حلی توگللنمهگن حسابلری بار. اَیریم مزاجلر اونگه پول بېریشی کېرهک، او هم بعضی آدملر بیلن حساب-کتابلرینی یاپیشی لازم. دوکاندهگی ماللر هم ساتیلیشی کېرهک. دایمي مشتریلری و دوکاندهگی ماللرنی نقد پولگه ایلنتیریش اوچون او هر کونی کېلیب، شو یېرده اۉتیرهدی.
دخل آرتیده تورگن پاکستانلیک ییگیت کون بۉیی ایشلهیدیگن شاگرد اېدی. غنیگل اونی عیناً شو کونلر اوچون ایشگه آلگن – قالگن ماللرنی ساتیب، حساب-کتابلرینی یکونلهگونچه اونینگ اۉرنیده توریشی اوچون.
-نېگه قَیتیهپسیز؟ – دېدیم.
بیر نېچه لحظه سکوت سهقلهدی.
-اۉتّیز ییلدن بېری بو محله مېنی تنيدی، – دېدی.
کېین اجتماعي ترماقلرده رۉیخطلرنی کۉرگنینی ایتدی. پولیس افغانستانلیکلرنی حبسگه آلیش و دېپورت قیلیش اوچون تیارلهگن حدودلر و بازارلر رۉیخطی حقیده باشقهلردن اېشیتگن اېدی. اۉز اسمی قَیسی صحیفهده بارلیگینی بیلمسدی، اما بارد بازاری هم قۉلمه-قۉل ترقهتیلهیاتگن رۉیخطلرده بارلیگینی بیلردی. او دوکانگه ینه کیمدیر کیریب، اونی آلیب کېتیشینی کوتیشنی ایستهمسلیگینی ایتدی.
او اۉزیدن کۉره کۉپراق دوکان پولیدن گپیرردی. دفترلرنی آچدی. مشتریلرنینگ اسملری، قرضلری و تاریخلر یانمه-یان یازیلگن اېدی. بعضی صحیفهلر تۉلیب کېتگن، اَیریملریده اېسه حلی بۉش جایلر بار اېدی. او پوللرینی نقد قیلیب آلیشی کېرهکلیگینی ایتدی.
اۉشه ایچکری خانهده اون خلتهلری و یاغ قوتیلری ینه اېشیک آرتیگه ترتیب بیلن تېریلدی. پاکستانلیک ییگیت کیریش یۉلینی آچیش اوچون اولرنی بیرمه-بیر سوردی.
غنیگل اۉشه یېرده اۉتیردی. پکه ایلنردی. پرّکلری هر بیر نېچه ایلنیشدن کېین تیترهب کېتردی. ترموز چایی یانیده تورردی، گیلاس اېسه همان قۉلیده اېدی. اوندن افغانستانگه قَیتسه، قهیېرگه باریشینی سۉردیم.
بو سفر درحال جواب بېرمهدی.
-بیلمهیمن. اۉتّیز ییلدن بېری بارمهدیم.
اېسکی مشتریلر کېلیشهدی. بعضیلری خرید اوچون، بعضیلری اوّلگی قرضلرینی تۉلهش اوچون. غنیگل دفترنی آچهدی، خودکار قلمنی آلهدی، رقملرنی یازهدی و ماشین حسابده حسابلهیدی. «همه نرسه انیق بۉلیشی کېرهک»، دېیدی.
خیرلشگنیمیزده، غنیگل چای گیلاسینی یېرگه قۉیگن اېدی. نمازگاه حلی هم خانه نینگ بیر چېتیده تورردی. پکه ایلنردی.
تشقریده پاکستانلیک ییگیت دخل آرتیده توریب، تېلفونده گپلشردی. اون خلتهلری اۉز جاییده اېدی. آرقه اېشیک یاپیق اېدی.
ایضاح: گزارش پیشاورده اۉتکزیلگن بېواسطه صحبت اساسیده تیارلنگن.
