طالبلرنینگ هراتدهگی اخبارات و مدنیت ریاستی گازرگاه منطقهسیدهگی خواجه عبدالله انصاري جامع مسجدینی قوریش ایشلری ۱۰۷ میلیون افغاني مبلغ عوضیگه یکونلنگنی و مسجد فایدهلنیشگه تاپشیریلگنینی معلوم قیلدی.
مسجد هراتنینگ تاریخي آبدهلریدن بیری حسابلنگن خواجه عبدالله انصاري مقبرهسی یانیده قوریلگن.
اَیریم مدنیت فعاللری اوشبو تاریخي حدودده قوریلیش ایشلری آلیب باریلهیاتگنیدن خواطر بیلدیرگن اېدی. بیراق بو خواطرلرگه قرهمهی، طالبلر ینگی مسجد قوریلیشینی یکونلهدی.
طالبلرنینگ هراتدهگی اخبارات و مدنیت ریاستی مدنیت و صنعت بۉلیمی باشلیغی عبدالمتین عادلنینگ ایتیشیچه، گازرگاهدهگی اوّلگی مسجد تۉلیق بوزیلیب، اونینگ اۉرنیگه ایکّی قبتلی، ۳ مینگ متر مربع میدانده زمانهوي طلبلرگه ماس ینگی مسجد قوریلگن. مسجد ۱۰مینگ نمازخواننی سیغدیره آلهدی.
هرات بیلیم یورتینینگ سابق صنعت فاکولتهسی اۉقیتووچیسی نوید مشعوف خواجه عبدالله انصاري مقبرهسی یانیده بوندهی انشاات قوریلیشیگه قرشی بۉلگنینی ایتدی. اونینگ تأکیدلشیچه، بونگه سبب لایحه معماري جهتدن طلبگه جواب بېرمسلیگی همده گازرگاه و اونینگ تاریخي مجموعهسیدهگی تېموريلر دوری و محلي معماري اسلوب بیلن اویغونلشمهگنیدیر.
او اۉزی نینگ فیس بوک صحیفهسیده ینگی قوریلگن مسجد گازرگاهدهگی موجود تېموريلر معمارچیلیگی بیلن هېچ قندهی اویغونلیک و اۉخشهشلیککه اېگه اېمسلیگینی یازگن.
تأکیدلش جایزکی، طالبلر سۉنگگی بېش ییللیک باشقرووی دوریده مسجدلر و دیني مدرسهلرنی کېنگهیتیریشگه علیحده اعتبار قرهتیب کېلماقده.
بو گروه عمومی قتناو یۉللری بۉییده اۉنلب مسجدلر قورگن. حالبوکه، یۉللرنینگ اۉزی طلبگه جواب بېرمهیدی و ترمیمگه محتاج.
