امریکا قۉشمه ایالتلری جکسنویل فلوریدا ایالتیده اۉزبېک تیلی ملي کونیگه بغیشلنگن مدني تدبیر اۉتکزیلدی. اونده بیر قطار فرهنگی شخصیتلر، عالِملر، شاعرلر همده اۉزبېک جماعه‌سی وکیللری اشتراک اېتدی.
محفل‌ده افغانستان پارلمانی‌نینگ سابق اعضاسی و تنیقلی اۉزبېک شاعری استاد سید عزیزالله الفتي اۉزبېک تیلی‌نینگ اهمیتی، اونینگ اۉزبېک خلقی‌نینگ مدني و تاریخي اۉزلیگیده‌گی اۉرنی همده اوشبو قیمتلی تیل و ادبي میراثنی اسره‌ب-اوه‌یلش ضرورتی حقیده سۉز یوریتدی.
شونینگدېک، بیر گروه عیاللر شعرلر اۉقیب، اۉزلری نینگ ادبي اثرلرینی تقدیم اېتدیلر. اولر تدبیرگه اۉزیگه خاص مدني روح بغیشلب، اۉزبېک تیلی و ادبیاتینی اسره‌ش، رواجلنتیریش همده کېله‌جک اولادلرگه یېتکزیشده عیاللرنینگ مهم رۉلینی نمایان اېتدیلر.
دستوری‌نینگ ینه بیر قِسمیده اشتراکچیلر اوچون عنعنوي و محلي اۉزبېک طعاملری تیارلنیب، دسترخوانگه تارتیلدی. بو اېسه تدبیر قتنشچیلری تامانیدن ایلیق کوتیب آلیندی.
افغانستان تشقریسیده بونده‌ی مدني تدبیرلر نینگ اۉتکزیلیشی فرهنگیلرنی بیرلشتیریش، اجتماعي علاقه‌لرنی مستحکملش همده یاش اولادنی اۉزبېک تیلی، تاریخی، ادبیاتی و مدنیتی بیلن یقیندن تنیشتیریش اوچون مهم امکانیت یره‌ته‌دی.
تدبیر آنه تیلینی اسره‌ش، مدني میراثنی محافظه قیلیش و ملي قدریتلرنی کېله‌جک اولادلرگه یېتکزیش مهم‌لیگینی تأکیدلب، تیل هر بیر خلق نینگ اۉزلیگی و تاریخی‌نینگ اجره‌لمس قِسمی اېکنینی ینه بیر بار اېسله‌تدی.
