طالبلرنینگ ساغلیقنی سقلش وزیرلیگیده‌گی «آزیق-طعام و دارو-درمان» معینیتی و طبي محصولاتلرنی ترتیبگه سالیش اداره‌ی باشلیغی حاضرده مملکتده دارولرنینگ قریب مینگ توری ایشلب چیقریله‌یاتگنینی، بیراق اولردن فقط ۴۰۰ توری خلق‌ارا ستندردلرگه موافق ایشلب چیقریله‌یاتگنینی ایتدی.
طالبلر تامانیدن باشقریله‌دیگن «حریت» نشری‌نینگ خبر بېریشیچه، ساغلیقنی سقلش وزیرلیگی‌نینگ اوشبو رسميسی مملکتده ۱۱۷ ته دارو ایشلب چیقرووچی فابریکه فعالیت یوریته‌یاتگنینی، اولردن فقط تۉرتته‌سی خلق‌ارا ستندردلرگه موافق فعالیت کۉرسه‌ته‌یاتگنینی هم ایتگن.
اونینگ قۉشیمچه قیلیشیچه، ینه ۱۸ ته فابریکه جهان ساغلیقنی سقلش تشکیلاتی‌نینگ اَیریم ستندردلرینی بجرگن، بیراق حلی برچه طلبلرنی تۉلیق ادا اېته آلمه‌گن.
طالبلر یقینده خصوصي شفاخانه‌لرنی هم بهالب، پایتخت کابل‌ده‌گی ۱۱۵ ته خصوصي شفاخانه‌دن اتیگی ایکّیته‌سی صفت جهتیدن «ای» درجه‌سینی آلیشگه موفق بۉلگنینی نشر قیلگن.
اوشبو بهالشگه کۉره، تۉقّیزته شفاخانه «ب»، ۳۹ ته‌سی اېسه «سی» درجه‌سینی آلگن، قالگن شفاخانه‌لر اېسه مذکور بهالشدن اۉته آلمه‌گن.
افغانستان طالبلرنینگ قَیته حاکمیتگه کېلیشیدن کېین کېنگ کۉلملی ساغلیقنی سقلش انقراضیگه دوچ کېلماقده. فقرالر خدمتلر صفتی پستلیگی و اولرنینگ نرخی یوقاریلیگیدن بیر نېچه بار شکایت قیلگن.
