تیناوون توشدن کېین تورکيه‌‌نینگ استانبول شهریده اۉزبېک تیلی ملي کونی مناسبتی بیلن فرهنگی محفل اۉتکزیلدی.
انه شو مناسبت بیلن اوتکزیلگن محغل‌ده بیلیمدانلر، تیلشناسلر، بیلیم یورتی اۉقیتووچیلری، سیاسي حزبلر نماینده‌لری، عیاللر، مدنی فعاللر، محصللر و یاشلر اشتراک اېتدی.
محفل دوامیده مدني و علمي چیقیشلر بیلن بیر قطارده، سیاسي حزبلرنینگ اۉزبېک تیلی ملي کونی مناسبتی بیلن یۉله‌گن پیاملری هم اۉقیب اېشیتتیریلدی. سۉزگه چیققنلر اۉزبېک تیلی و مدنیتی‌نینگ حالتی همده افغانستانده‌گی مدني وضعیت حقیده سۉز یوریتیب، اۉزبېک تیلی و مدنیتینی اسره‌ش، رواجلنتیریش و ترغیب قیلیش مهم‌لیگینی تأکیدله‌دیلر.
شونینگدېک، تدبیرده افغانستان خلقلری اۉرته‌سیده‌گی بیرلیککه اورغو بېریلیب، مملکتده‌گی تورلی تیللر و مدنیتلر خلقلر اۉرته‌سیده‌گی هم‌جهتلیک و بیردملیکنی مستحکملاوچی واسطه صفتیده قید اېتیلدی.
اۉزبېکچه شعرلر‌نینگ اۉقیلیشی، موسیقی اجراسی، اۉزبېک تیلیده‌گی کتابلرنینگ نمایشی و مدني اثرلرنینگ تقدیماتی تدبیر نینگ باشقه قِسملریدن بۉلدی.
محفل دایره‌سیده‌گی کۉرگزمه‌ده محلي طعاملر، اۉزبېکلرنینگ ملي کییملری همده قدیمي اوی-روزگار بویوملری نمایش اېتیلدی. شونینگدېک، محفل دوامیده کوره‌ش مسابقه‌سی هم اۉتکزیلدی.
اوشبو تدبیر اۉزبېک تیلی ملي کونی مناسبتی بیلن تیناوون امریکا نینگ قطار شهرلریده، آلمان‌نینگ هامبورگ شهریده، سویس‌نینگ زوریخ شهریده، شونینگدېک، تورکيه نینگ انقره و قونیه شهرلریده هم مدني تدبیرلر اۉتکزیلگن بیر پیتده تشکیل اېتیلدی.
