طالبلرنینگ امر به معروف و نهی از منکر وزیرلیگی بوندن بویان تۉی مراسملری، بیره‌ملر و شونگه اۉخشه‌ش باشقه ییغینلرده «پتاقی» و شونگه اۉخشه‌ش واسطه‌لردن فایده‌لنیش «مطلقا» تعقیقلنگنینی معلوم قیلدی.
اوشبو وزیرلیک بوگون (سه‌شنبه، ۵ عقرب) نشر قیلگن بیاناتیده: «شادیانه مراسملری اسلامي کۉرسه‌تمه‌لر و شریعت قاعده‌لریگه موافق اۉتکزیلیشی کېره‌ک. بونده‌ی مراسملر بېزاوته قیلووچی خطی-حرکتلر طفیلی باله‌لر، عیاللر، کېکسه‌لر، بېمارلر و باشقه کیشیلرده قۉرقوو و تشویش اویغاتمسلیگی لازم»، دېب تأکیدله‌گن.
طالبلرنینگ امر به معروف و نهی از منکر وزیرلیگی «پتاقی» و شونگه اۉخشش واسطه‌لرنی قیلووچیلر، ایشلب چیقرووچیلر، ساتووچیلر همده اولردن فایده‌لنووچیلرنی آگاهلنتیریب، اوشبو بویروقنی بوزگنلرگه نسبتاً «شرعي و قانوني چاره‌لر» کۉریلیشینی بیلدیرگن.
طالبلرنینگ امر به معروف و نهی از منکر خادملری مملکتده تۉی و بیره‌م مراسملری اۉتکزیلیشینی نظارت قیلیب کېله‌دی. اولر بیر نېچه بار بونده‌ی مراسملرگه باستیریب کیریب، موسیقی قۉییش یاکه چه‌لیشده عیبلنگن اشتراکچیلرنی حبسگه آلگن.
طالبلرنینگ امر به معروف و نهی از منکر وزیرلیگی «پتاقی»دن فایده‌لنیشنی تعقیقلش حقیده‌گی بیاناتیده فقرالرنی اوشبو تعقیقنی عملگه آشیریشده همکارلیک قیلیشگه چقیرگن.
فقرالر نینگ انسان حقوقلری و اساسي حقوقلرینی کېنگ کۉلمده بوزیشده عیبلنیب کېله‌یاتگن اوشبو وزیرلیک مذکور تعقیقدن کۉزلنگن مقصد «خلق نینگ آسایشته‌لیگی و فراوانلیگینی تأمینلش، اولرنینگ روحي خوفسیزلیگینی سقلش همده قانوني حقوقلرینی حمایه قیلیش» اېکنینی تأکیدله‌گن.
بوندن آلدین طالبلرنینگ ایچکی ایشلر وزیرلیگی مملکت‌نینگ اَیریم شهرلریده تونگی ساعت تۉقّیزدن کېین «پتاقی»دن فایده‌لنیشنی تعقیقله‌گن اېدی.
شونگه قره‌مه‌ی، «پتاقی»دن فایده‌لنیش کابل و مملکت نینگ باشقه اَیریم شهرلریده هنوز دوام اېتماقده و بو آدملر نینگ روحي آسایشته‌لیگینی بوزماقده.
