امریکا حکومتی مهاجرلرنی اوچینچی دولتلرگه دېپورت قیلیش سیاستی دایره‌سیده بیر گروه افغانستانلیک مهاجرلرنی پاکستانگه اۉتکزیشنی رېجه‌لشتیرماقده.
«بلومبرگ» اخبارات آژانسی دوشنبه کونی (۴ عقرب) امریکا فدرا‌ل حکومتی و باش‌پناه ایزلاوچیلرنی قۉللب-قوّتلاوچی تشکیلاتلرده‌گی خبردار منبعلرگه ته‌یه‌نیب، بو حقده خبر بېردی.
امریکا فدرا‌ل حکومتی نماینده‌سی، مهاجرت بۉییچه وکیل مدافع لر و باش‌پناه ایزلاوچیلرنی قۉللب-قوّتلاوچی تشکیلاتلر اوشبو رېجه حقیده خبردار اېکنلیکلرینی ایتیشگن. احتمالي دېپورت پروازی حلی رسماً اعلان قیلینمه‌گن، بیراق او یقین هفته‌لرده عملگه آشیریلیشی کوتیلماقده.
اوشبو نشر خبریگه کۉره، امریکا مهاجرت خدمتی خادملری حبسده سه‌قلنه‌یاتگن اَیریم افغانستانلیک مهاجرلرگه اولر نینگ پاکستانگه دېپورت قیلینیشینی معلوم قیلیشگن.
«بلامبرگ» منبعلری نینگ ایتیشیچه، پاکستانگه کۉچیریلیشی رېجه‌لشتیریلگن شخصلر آره‌سیده کابل طالبلر قۉلیگه اۉتیشیدن آلدین امریکا اوردوسی بیلن همکارلیک قیلگن اَیریم کیشیلر نینگ قرینداشلری هم بار.
«افغان ایواک» تشکیلاتی هم حبسده‌گی شخصلردن شونگه اۉخشه‌ش خواطرلر کېلیب توشگنینی تصدیقله‌گن.
تشکیلات نینگ بیلدیریشیچه، حبسده سقلنه‌یاتگن افغانستانلیک مهاجرلرنی لوئیزیانا ایالتیدن آلیب چیقیش اوچون مخصوص پرواز رېجه‌لشتیریله‌یاتگنی حقیده معلومات آلگن.
حاضرچه امریکا و پاکستان حکومتلری وکیللری بو مسأله یوزه‌سیدن رسماً و آچیق بیانات بېرمه‌گن.
«افغان ایواک» معلوماتلریگه کۉره، حبسده‌گی اَیریم شخصلرگه پاکستانگه یوباریلیشلری ایتیلگن، باشقه بیر گروهگه اېسه اولرنینگ منزلی افغانستان اېکنی معلوم قیلینگن.
«افغان ایواک» امریکا حکومتیده‌گی منبعلریگه ته‌یه‌نیب، پاکستاندن اوچینچی دولت صفتیده و اوشبو شخصلرنی افغانستانگه اۉتکزیش یۉلی صفتیده فایده‌لنیلیشی ممکنلیگینی بیلدیرگن.
تشکیلات نینگ ایتیشیچه، سۉنگگی ایکّی هفته ایچیده اقش نینگ ۱۱ ایالتده‌گی ۱۵ حبس مرکزیدن افغانستانلیک مهاجرلرنینگ «احتمالي کۉچیریلیشی» حقیده کمیده ۳۰ته پیام آلگن.
امریکا بوندن آلدین هم مهاجرلرنی اوچینچی دولتلرگه دېپورت قیلیش دستورینی عملگه آشیرگن.
جمله‌دن، «آسوشیتدپرس» اخبارات آژانسی ایکّی آی اوّل، ۷-سنبله کونی امریکا مرکزي افریقا جمهوریتی پایتختی بانگی‌گه اۉنلب مهاجرلر، جمله‌دن، افغانستان‌نینگ ۱۲فقراسی آلیب کېتیلگنینی خبر قیلگن اېدی.
نشر معلوماتیگه کۉره، دېپورت قیلینگنلر آره‌سیده ۲۰ یاشلی بیر ییگیت هم بۉلگن. اونینگ اکه‌لری افغانستان نینگ سابق حکومت تیزیمیده امریکا اوردوسی بیلن همکارلیک قیلگن. اۉشه پیتده ییگیت نینگ وکیل مدافع سی آلما دیوید امریکا محکمه‌سی طالبلر تامانیدن تعقیب قیلینیش خوفی موجودلیگی سببلی اونی افغانستانگه دېپورت قیلیشنی تعقیقله‌گنینی ایتگن اېدی.
