طالبلر کنترلی آستیده‌گی احصایه اداره‌سی لوگون (سه‌شنبه،۵ عقرب) نشر قیلینگن آماریگه کۉره، افغانستان جاري ییل نینگ دستلبکی آلتی آییده ۵۹۸.۵ میلیون دالرلیک محصولات صادر قیلگن. اۉتگن ۱۴۰۴ییل نینگ شو دوریده اېسه صادرات حجمی ۷۲۴.۲ میلیون دالرنی تشکیل اېتگن.
احصایه اداره‌سی معلوماتلریگه کۉره، جاري ییل نینگ دستلبکی آلتی آییده قوریتیلگن و تازه مېوه‌لر ۲۲۳.۵میلیون دالرلیک قیمت بیلن مملکت صادرات ترکیبیده اېنگ کتّه اولوشنی اېگه‌لله‌گن. شوندن کېینگی ا‌ۉرینلرده ۱۳۶.۹میلیون دالرلیک داریوار اۉسیملیکلر، ۳۲.۱ میلیون دالرلیک منرال محصولاتلر و ۱۲.۵میلیون دالرلیک قیشلاق خۉجه‌لیگی اوروغلری قید اېتیلگن.
سۉنگگی آلتی آیده افغانستان صادرات کمه‌یگن بیر پیتده، مملکت وارداتی آشگن.
احصایه اداره‌سی معلوماتیگه کۉره، افغانستان نینگ ۱۴۰۵-ییل دستلبکی آلتی آییده‌گی واردات قیمتی ۶ میلیارد ۶۵۶.۶میلیون دالرنی تشکیل اېتگن. ۱۴۰۴ییل نینگ شو دوریده اېسه بو کۉرستکیچ ۶میلیارد ۵۴۰.۳ میلیون دالرگه تېنگ بۉلگن. ایکّی کۉرسه‌تکیچنی تققاسلش واردات حجمی ۱۱۶.۳میلیون دالرگه آشگنینی کۉرسه‌ته‌دی.
نفت محصولاتلری و مایلر ۱ میلیارد ۳۹۹میلیون دالرلیک قیمت بیلن وارد قیلینه‌دیگن محصولاتلر آره‌سیده اېنگ کتّه اولوشنی اېگه‌لله‌گن. کېینگی ا‌ۉرینلرده ۷۶۵ میلیون دالرلیک مو‌تر-اسکونه‌لر، ترانسپورت واسطه‌لری و احتیاط قِسملر، ۶۹۱.۳میلیون دالرلیک مېتالر و مېتال محصولاتلری، ۵۵۴ میلیون دالرلیک بوغدای و بوغدای اونی همده ۲۴۰.ه میلیون دالرلیک اۉسیملیک یاغی توره‌دی.
پاکستان بیلن چېگره‌ده‌گی اۉتیش پونکتلری افغانستان نینگ مهم واردات و صادرات یۉنه‌لیشلریدن بیری حسابلنردی. بیراق اۉتگن ییلدن بویان پاکستان حکومتی بیلن طالبلر اۉرته‌سیده‌گی ضدیتلر سببلی اوشبو چېگره پونکتلری یاپیق قالماقده.
واردات حجمی نینگ آشیشی پاکستان محصولاتلری اۉرنینی باشقه مملکتلردن کېلتیریله‌یاتگن تاوه‌رلر اېگه‌لله‌گن بۉلیشی ممکنلیگینی کۉرسه‌ته‌دی. شونگه قره‌مه‌ی، پاکستان بیلن چېگره اۉتیش پونکتلری نینگ یاپیلیشی افغانستان صادراتیگه سلبي تأثیر کۉرسه‌تیشده دوام اېتماقده.
سۉنگگی آلتی آیده افغانستان صادراتی حجمی ۱۴۰۴-ییلده‌گی عمومي صادرات قیمتی‌نینگ چارک قِسمیدن سَل کۉپراقنی تشکیل اېتگن. اۉتگن ییلی افغانستان‌نینگ جمعی صادراتی ۲ میلیارد دالر دېب اعلان قیلینگن اېدی.
