امریکا و ایران اۉرتهسیده اوروشنی یکونلش بۉییچه کېلیشوو امضالنگنیدن بیر نېچه ساعت اۉتیب، رویترز آژانسی سعوديه عربستانی بیراغی آستیدهگی، جمعی آلتی میلیون بشکه خام نفت آرتیلگن اوچته ییریک کېمه پنجشنبه کونی هرمز بۉغازیدن اۉتگنینی خبر قیلدی.
مذکور کېلیشوو هرمز بۉغازینی زودلیک بیلن قَیته آچیش و امریکا تامانیدن ایران بندرلریگه قۉییلگن قمل بېکار قیلیشنی نظرده توتهدی.
رویترز معلوماتیگه کۉره، سعوديه عربستانی نینگ اوشبو نفت تانکرلری کېلیشوو امضالنگنیدن کېین هرمز بۉغازیدن اۉتگن ایلک کېمهلر حسابلنهدی.
اوشبو خبرگزارلیک نینگ یازیشیچه، ایلگری اوزهتکیچلرینی اۉچیریب، اۉز جایلشووینی یشیریب کېلگن باشقه کېمهلر هم اېندی اۉز کوردیناتلرینی آچیق اعلان قیلیب، بۉغازدن اۉتیشگه تیارگرلیک کۉرماقده. بیراق کېمه اۉپیراتورلری قتناو حجمی اوروشدن آلدینگی درجهگه قَیتیشی اوچون حلی وقت کېرهکلیگینی تأکیدلشماقده.
هرمز بۉغازی قَیته آچیلگچ، برنت مارکسیدهگی نفت فیوچېرسلری ینه ایکّی فایزگه ارزانلشیب، بیر بشکه اوچون 78 دالردن پستگه توشدی. بو اوروش باشلنگنیدن بویان قید اېتیلگن اېنگ پست کۉرستکیچ دیر.
عینِ پیتده، امریکا و ایران کېلیشووی آچیقچهسیگه یکونلشنی طلب قیلگن لبناندهگی اوروش هنوز دوام اېتماقده.
لبنان دولت اخبارات آژانسی پنجشنبه کونی اسرایل نینگ مملکت جَنوبیدهگی شهرلرگه اویوشتیرگن هوا هجوملری عاقبتیده اوچ کیشی هلاک بۉلگنینی معلوم قیلدی.
رویترز مخبرلری بیروت و اونینگ جَنوبي چېکّهلری اوزره پست بلندلیکده پرواز قیلهیاتگن اسرایل اوچووچیسیز اوچیش اپاراتی آوازینی اېشیتگنینی بیلدیرگن.
اېران دایما هر قندهی تینچلیک کېلیشووی لبان مسألهسینی هم اۉز ایچیگه آلیشی کېرهکلیگینی تأکیدلب کېلگن. دونالد ترامپ امضالهگن حجتده اېسه لباندهگی اوروشنی «دایمي روشده توگهتیش» همده مملکت نینگ «حدودي یخلیتلیگی و حاکمیتینی» کفالتلش طلبی انیق قید اېتیلگن.
شونگه قرهمهی، اسرایل ترامپ واسطهچیلیگیدهگی مذاکرهلردن قطع نظر، لبناندن چیقیب کېتیش نیتی یۉقلیگینی بیلدیرگن.
رویترز بیلن صحبتلشگن ایکّی نفر اسرایل رسميسی، جملهدن نتانیاهوگه یقین یوقاری مرتبهلی عملدار، اسرایل لبنان حدودیده اۉز قۉشینلرینی سقلب قالیش مسألهسیده امریکا بیلن مذاکرهلر آلیب بارهیاتگنینی معلوم قیلگن.
