سوئیسنینگ جنوا شهریده شهمامه تشکیلاتی مېزبانلیگیده «افغانستان عیاللری اوچون عدالت و انسان حقوقلری یۉللری» موضوعسیدهگی خلقارا کنفرانس بۉلیب اۉتدی.
کنفراس اشتراکچیلری عیاللر نینگ تۉلیق، تېنگ و مضمونلی اشتراکیسیز افغانستان اوچون تینچلیک، برقرارلیک و برقرار کېلهجکنی تصور قیلیب بۉلمسلیگی حقیده علیحده تأکیدلهدیلر.
انجمنده تورلی مملکتلر دیپلوماتیک هیاتلری، بیرلشگن ملتلر تشکیلاتی آژانسلری، خلق ارا تشکیلاتلر، مدنی جماعه چیلیک فعاللری همده انسان حقوقلری بۉییچه متخصصلر قتنهشدی.
شهمامه تشکیلاتی مذکور کنفرانسدن کۉزلنگن مقصد افغانستاندهگی عیاللر و قیزلر احوالی نینگ تاباره یامانلشیب بارهیاتگنینی محاکمه قیلیش همده عدالت و جوابگرلیکنی مستحکملشگه قرهتیلگن خلقارا سعی-حرکتلرنی کۉریب چیقیش اېکنینی بیلدیردی.
تشکیلات اجراچی دیرېکتوری خلقارا همجعیت اعتبارینی افغانستان عیاللری احوالیگه قرهتیب توریش و اولرنینگ آوازی افغانستان کېلهجگیگه عاید برچه محاکمهلرنینگ مرکزیده قالیشینی تأمینلش مهملیگینی تأکیدلهدی.
اونینگ سۉزلریگه کۉره، اوشبو کنفرانس عیاللرنی جماعت حیاتیدن تیزیملی روشده چېتلشتیریش هېچ قچان عادتي حالگه ایلنیشی یاکه ینگی واقعلیک صفتیده قبول قیلینمسلیگینی ینه بیر بار نمایش اېتدی.
بیرلشگن ملتلر تشکیلاتینینگ افغانستاندهگی انسان حقوقلری بۉییچه مخصوص گزارشگری رچارد بنت اۉز نطقیده عیاللر حقوقلری نینگ ایزچیل چېکلنیب بارهیاتگنیگه تۉختهلیب، خلقارا حقوقي، سیاسي و انسان حقوقلری میکانیزملری آرقهلی جوابگرلیکنی تأمینلش بۉییچه کومپلېکس یاندشوو ضرورلیگینی تأکیدلهدی.
شهمامه تشکیلاتینینگ معلوم قیلیشیچه، کنفراسده ایلگری سوریلگن اساسي توصیهلر قطاریگه افغانستان بۉییچه مستقل تېرگاو میکانیزمینی تېزراق ایشگه توشیریش، خلقارا جوابگرلیک سعی-حرکتلرینی کوچهیتیریش همده افغان عیاللری نینگ مملکت کېلهجگیگه عاید برچه محاکمه و قرار قبول قیلیش جریانلریده مضمونلی اشتراکینی تأمینلش کیرهدی.
تشکیلات بیاناتیده شوندهی دېییلهدی: «کنفراس دوامیده بیرته انیق خلاصه ینگرهدی: افغانستان عیاللری ظلم و تضییقلرنینگ پسیف قربانلری اېمس. اولر نهایتده مرکّب شرایطلرگه قرهمهی، یېتکچیلیک قیلیش، حقوقلرنی حمایه اېتیش، تشکیلاتچیلیک و قرشیلیک کۉرسهتیشنی دوام اېتتیرماقده. اولر نینگ آوازی، تجربهسی و یېتکچیلیگی افغانستان کېلهجگینی شکللنتیریشگه قرهتیلگن برچه سعی-حرکتلرنینگ مرکزیده قالیشی کېرهک.»
