«تورخم ترانسپورت بیرلشمهسی» تورخم چېگره اۉتیش یۉلی افغانستانده قالیب کېتگن پاکستان یوک موترلرینینگ قَیتیشی اوچون قَیته آچیلگنینی معلوم قیلدی.
بیرلشمه باشلیغی عظیم الله شینوري نینگ ایتیشیچه، تورخم اۉتیش یۉلی کېچه (۲۸جوزا، پنجشنبه)دن باشلب پاکستان یوک موترلری نینگ قَیتیشی اوچون آچیلگن و حاضرگچه افغانستانده قالیب کېتگن یوزلب یوک موترلری پاکستانگه قَیتگن.
حاضرچه چېگره قندهی میکانیزم اساسیده آچیلگنی و پاکستان ترانسپورت واسطهلری حرکتی اوچون قنچه مدت آچیق قالیشی انیق اېمس.
افغانستان و پاکستان اۉرتهسیدهگی چېگره اۉتیش پونکتلری طالبان و پاکستان اۉرتهسیدهگی ضدیتلر سبب ۲۰۲۵ییل اکتوبر آییدن بویان یاپیق اېدی. چېگرهلر یاپیلیشی نتیجهسیده هر ایکّی تامانده یوزلب یوک آرتیلگن ترانسپورت واسطهلری قالیب کېتگن.
افغانستان و پاکستاندهگی هیداوچیلر همده تدبیرکارلر تورخم نینگ قالیب کېتگن پاکستان یوک موترلری اوچون آچیلگنینی ممنونیت بیلن کوتیب آلدیلر.
افغانستان-پاکستان قۉشمه سودا و صناعت اتاقی رئیسی اۉرینباسری ضیا الحق پاکستان یېتکرمهلریگه بېرگن بیاناتیده، سۉنگگی سکّیز آی دوامیده چېگرهلر یاپیق قالیشی نتیجهسیده فقط پاکستان نینگ اۉزی۹۸۱میلیون دالردن آرتیق ضرر کۉرگنینی ایتدی.
اونینگ قۉشیمچه قیلیشیچه، پاکستان نینگ مرکزي آسیا دولتلری بیلن سوداسی هم اوشبو چېکلاولردن جدّي ضرر کۉرگن و سکّیز آی ایچیده قریب۲۲۰ میلیون دالر یۉقاتیشگه اوچرهگن.
افغانستان و پاکستان اۉرتهسیدهگی چېگره اۉتیش یۉللرینینگ یاپیلیشی افغانستان تدبیرکارلریگه هم کتّه اقتصادي ضرر یېتکزگن همده مملکت بازارلریده کۉپلب محصولاتلر نرخی نینگ آشیشیگه سبب بۉلگن.
