طالبلر مدافعه وزیرلیگی بو گروهنینگ هوا کوچلری پاکستان نینگ خیبرپختونخوا و بلوچستان ایالتلریده «داعش مرکزلری»نی نشانگه آلگنینی معلوم قیلدی.
اوشبو وزیرلیک بوگون (جمعه،۲۹ جوزا) نشر قیلگن بیاناتیده ایتیلیشیچه، اوشبو هجوملر کېچه تونده بلوچستانده ایکّی نقطهده و خیبر-پختونخوا ایالتیده بیر نقطهده عملگه آشیریلگن.
طالبان مدافعه وزیرلیگی بیاناتیگه کۉره، بلوچستان ایالتی نینگ قلعه عبدالله اولسوالیگیدهگی «گُلستان» حدودی همده چاغی اولسواللیگیدهگی «شکر آب- جنگلگردی» حدودیده داعشنینگ «قۉشمه مرکزلری» نشانگه آلینگن.
شونینگدېک، وزیرلیک خیبر-پختونخوا ایالتینینگ اورکزی اجنسیگه قرهشلی «قمبرخیل» منطقهسیده هم «داعش خراسان بۉلیمیگه تېگیشلی بیر مرکزگه ضربه بېریلگنی، او یېرگه اَیریم مهم یېتکچیلر هم قتنب تورگنی»نی قۉشیمچه قیلگن.
وزیرلیکنینگ بیلدیریشیچه، بو هجوملر موفقیتلی عملگه آشیریلگن بۉلیب، اوشبو مرکزلردن افغانستانگه قرشی هجوملرنی رېجهلشتیریش و تشکیل اېتیشده «بعضی دشمن استخبارات دایرهلری بیلن همکارلیکده» فایدهلنیلگن.
پاکستان حکومتی و اوردوسی حاضرچه طالبان نینگ اوشبو ادعاسیگه هېچ قندهی مناسبت بیلدیرمهگن.
