چېگرهسیز خبرچیلر تشکیلاتی «خلق ارا قاچقینلر» کونی عرفهسیده معلوم قیلیشیچه، ۲۰۲۱-ییلدن ۲۰۲۵-ییلگچه۱۴۶۸ نفر ژورنالیست۶۵ ته مملکتدن «تهدید، قماق و اۉلیم خوفی» سببلی قاچیشگه مجبور بۉلگن و حاضرده مهاجرلیکده یشماقده. اولرنینگ دېیرلی یرمی افغانستاندن اېکنلیگی قید اېتیلگن.
تشکیلات بوگون (جمعه،۲۹جوزا) اعلان قیلگن گزارشیگه کۉره، ۲۰۲۱- ییلده طالبان حاکمیتگه قَیتگنیدن سۉنگ افغانستان دنیاده ژورنالیستلر مهاجرلیگینینگ اساسي مرکزیگه ایلنگن. شو دور ایچیده ۶۷۷ نفر افغانستانلیک ژورنالیست تشکیلات کۉمهگی بیلن مملکتنی ترک اېتگن.
گزارشده ایتیلیشیچه، افغانستاندن چیققن ژورنالیستلر حاضرده۲۸ ته دولتگه ترقهلگن بۉلیب، بو زمانهوي تاریخدهگی اېنگ ییریک مستقل ژورنالیستلر مهاجرلیگی تۉلقینلریدن بیرینی تشکیل اېتهدی.
تشکیلات معلوماتیگه کۉره، اېنگ کتّه چیقیش تۉلقینی ۲۰۲۲-ییلده کوزهتیلگن بۉلیب، اۉشه ییلی۱۸۳ ژورنالیست مملکتنی ترک اېتیشگه مجبور بۉلگن.
شونینگدېک، ژورنالیستلرنینگ افغانستاندن چیقیشی حلی هم دوام اېتهیاتگنی و ۲۰۲۵-ییلده هم ینه۸۲ نفر ژورنالیست مملکتنی ترک اېتگنلیگی قید اېتیلگن.
بیراق افغانستاندن چیقیب، دنیانینگ تورلی دولتلریده مهاجرلیکده یشهیاتگن ژورنالیستلرنینگ حقیقي سانی بوندن هم کۉپراق بۉلیشی ممکنلیگی تأکیدلنگن.
چېگرهسیزخبرچیلر تشکیلاتی اۉز گزارشیده افغانستانلیک ژورنالیستلر حتی باشپناه تاپگن مملکتلرده هم خوفسیز اېمسلیگینی بیلدیرگن.
خصوصاً، تشکیلات پاکستاندهگی افغانستان ژورنالیستلری حالتیگه اعتبار قرهتیب،۲۰۲۳-ییلدن باشلنگن افغان قاچقینلرینی عامهوي دېپورت قیلیش جریانیده کمیده۵۰ نفر ژورنالیست مجبورن افغانستانگه قَیتریلگنینی ایتگن.
شونینگدېک، پاکستانده کۉپلب افغانستان ژورنالیستلرینینگ یشش ویزهلری اوزهیتیریلمهیاتگنی، بو اېسه اولرنی حقوقي جهتدن ناقانوني حالتده یششگه مجبور قیلهیاتگنی قۉشیمچه قیلینگن.
گزارشده افغانستان ایچیدهگی وضعیتگه هم تۉختهلیب اۉتیلگن بۉلیب، طالبان عامهوي اخبارات واسطهلریگه چېکلاولرنی دوام اېتتیرهیاتگنی و حاضرده کمیده بېش نفر ژورنالیست گروه تامانیدن حبسده سقلنهیاتگنی بیلدیریلگن.
تشکیلات بیاناتیده شوندهی دېییلگن: «افغانستان ژورنالیستلری اوچون هر ییلی تنلاولر کمهییب بارماقده: میدیا میداندن یۉقالیش، مهاجرلیک یاکه حبس خوفی.»
طالبان ۲۰۲۱-ییلده قَیته حاکمیتگه کېلگنیدن سۉنگ افغانستانده مېدیا فعالیتی و ژورنالیستلرگه نسبتاً کېنگ کۉلملی چېکلاولر جاري اېتگن، بیر نېچه بار مېدیا ادارهلریگه باستیریب کیریب، فعالیتنی تۉختهتگن و ژورنالیستلرنی حبسگه آلگن.
شو دوردن بېری یوزلب ژورنالیستلر، مېدیا خادملری و فعاللر حبس، قییناقلر و قماق خوفی سببلی مملکتنی ترک اېتیب، اروپا و امریکا کبی تورلی دولتلرگه باشپناه ایزلب کېتگن.
