ناروی قاچقینلر کېنگشی افغانستانده محتاجلرگه کۉرسهتیلهیاتگن انسانپرورلیک یاردملر اوچون اجرهتیلگن مبلغ تاریخدهگی اېنگ پست درجهگه توشگنینی معلوم قیلدی.
اوشبو کېنگش باش کاتبی یان ایگلند بوگون (چهارشنبه، ۱۰سرطان) اعلان قیلگن بیاناتیده افغانستان جاري ییلده ایلک بار دنیادهگی اعتباردن چېتده قالگن بحرانلر رۉیخطیگه کیریتیلگنینی ایتدی.
بیرلشگن ملتلر تشکیلاتی افغانستاندهگی۲۱ میلیوندن آرتیق محتاج انسانگه یاردم کۉرسهتیش اوچون۱.۷میلیارد امریکا دالری سۉرهگن. بیراق حاضرگچه ضرور مبلغ نینگ اتیگی۱۶ فایزی تأمینلنگن.
ناروی قاچقینلر کېنگشینینگ تأکیدلشیچه، ییللر دوامیده غرب نینگ کېنگ کۉلملی انسانپرورلیک و قیمت حربي عملیاتلریگه گواه بۉلگن افغانستان اهالیسی بوگونگی کونده اېنگ کم مالیوي یاردم آلهیاتگن خلقلردن بیریگه ایلنگن.
تشکیلات یاردملر نینگ کمهییشینی امریکا تامانیدن مالیوي قۉللب-قوّتلش تۉختهتیلگنی بیلن ایضاحلهدی.
بیاناتده قید اېتیلیشیچه، ۲۰۲۴-ییلگچه امریکا افغانستانگه اجرهتیلگن خلق ارا یاردم مبلغلری نینگ۴۰ فایزدن آرتیغینی تأمینلب کېلگن.
بو قیسقریش عینِ پیتده۲۱.۹میلیون کیشی یاردمگه محتاج بۉلیب تورگن و قۉشنی دولتلردن میلیونلب افغانستانلیکلر وطنگه قَیتهیاتگن بیر پیتده یوز بېرماقده.
کېنگش معلوماتیگه کۉره، افغانستانگه قَیتگن وایهگه یېتگنلرنینگ اتیگی۱۱ فایزی تۉلیق ایش بیلن تأمینلنگن.
یان ایگلند اېگېلند شوندهی دېدی: «حاضر افغانستان اوچون اجرهتیلهیاتگن مبلغ تاریخدهگی اېنگ پست درجهگه توشگنینی کۉریهپمیز. بوگونگی کونده انسانپرورلیک احتیاجلرنی قاپلش اوچون ضرور بۉلگن هر آلتی دالرنینگ اتیگی بیر دالری تأمینلنماقده.»
ناروی قاچقینلر کېنگشی بوتون دنیا بۉیلب کۉچیریلگن اهالی اوچون اجرهتیلهیاتگن یاردم مبلغلری قیسقرهیاتگنیدن هم آگاهلنتیردی.
بیاناتده شوندهی دېییلهدی: «زۉرآورلیک و مجبوري کۉچیش دوام اېتماقده. شو بیلن بیرگه، اینفلیهتسيه کوچهییب، اساسي احتیاج محصولاتلری قمیتلشماقده، مبلغ یېتیشماوچیلیگی اېسه انسان پرورلیک یاردمنی قیسقرتیرماقده. اگر دنیا اۉز یۉلینی اۉزگرتیرمسه، جوده کتّه تلفاتلرگه گواه بۉلهمیز.»
تشکیلات معلوماتیگه کۉره، ۲۰۲۶ییل نینگ بیرینچی یرمیده دنیا بۉیلب یاردمگه محتاج۲۵۲ میلیون کیشیدن۱۴۳ میلیونینی قۉللب-قوّتلش اوچون ضرور مبلغ نینگ اتیگی۳۰فایزی ییغیلگن.
یان ایگلند خلقارا همجمعیتنی یاردمنی کېسکین آشیریشگه چقیریب، شوندهی دېدی:
«ماجرا و فلاکت قربانلریگه نسبتاً گلوبهل سخاوت جوده پست درجهده. اگر مالیوي یاردم سېزیلرلی درجهده آشیریلمسه، یاردمگه محتاج سان-سناقسیز جماعهلر نینگ بو ییل یاردم آلیش امکانیتی جوده کم بۉلهدی. کوسمیک دستورلر و جهان چمپیاناتلرینی مالیهلشتیریشگه قادر دولتلر بحران ایچیده یشهیاتگن انسانلرنی قۉللب-قوّتلش اوچون هم زودلیک بیلن حرکت قیلیشی کېرهک.»
