افغانستان انسان حقوقلری مرکزینینگ معلوم قیلیشیچه، طالبلر محرّم آیینینگ بیرینچی اۉن کونلیگیده کابلدهگی بیر تعزیهخانهدن کمیده۴۶ نفر شیعه عزادارنی همده ماتم بیراقلری و رمزلرینی کۉترگنلیکده عیبلنگن ینه ۹ کیشینی اۉزباشیمچهلیک بیلن حبسگه آلگن.
مرکز تیناوون (سهشنبه، ۹-سرطان) نشر قیلگن بیاناتیده، اوشبو شخصلر طالبلر عدلیه وزیرینینگ بویروغی بیلن قۉلگه آلینیب، اونینگ شخصي قماقخانهسیده سقلنهیاتگنینی بیلدیردی.
بیاناتگه کۉره، طالبان امام حسن مجتبی مسجدی، محمديه مسجدی و گُلزار شهدا حسینیهسی کبی بیر نېچه مسجد و حسینیهلرگه باستیریب کیرگن. شونینگدېک، معمانی مذاکره یۉلی بیلن حل قیلیش اوچون بارگن افغانستان شیعه علمالری کېنگشی وکیللریگه هم نااۉرین مناسبتده بۉلگن.
مرکزنینگ تأکیدلشیچه، هرات ولایتیده هم طالبلر کۉچه عزادارلیک مراسملری، علم و ماتم رمزلرینی کۉتریشنی تعقیقلب، عاشورا کونی فقط بېلگیلنگن جایلرده چېکلنگن ییغیلیشلرگه رخصت بېرگن.
بیاناتده ایتیلیشیچه، هراتدهگی وکیللر رخصت آلیش اوچون بیر نېچه بار طالبلر ادارهلریگه مراجعت قیلگن، بیراق رد جوابینی آلگن.
شونینگدېک، بلخ، باميان و غزنی ولایتلریدن هم عزدارلیک مراسملریگه قۉییلگن چېکلاولر همده مسجد و حسینیه مسووللرینینگ حبسگه آلینگنی حقیده اۉخشش خبرلر کېلیب توشگن.
افغانستان انسان حقوقلری مرکزی بو حالتلر طالبلر حاکمیتی دوریده شیعهلر، اسماعیليلر و صوفيلرنینگ دیني اېرکینلیکلرینی تیزیملی و رسمي روشده چېکلش سیاستی نینگ بیر قِسمی اېکنینی تأکیدلهدی.
مرکزنینگ قید اېتیشیچه، برچه مسلمانلر تامانیدن حرمت قیلینهدیگن اما حسین عزدارلیک مراسملرینی چېکلش اسلامدهگی رحم-شفقت و بیرلیک روحیگه ضد حسابلنهدی.
بیاناتده: «اسلام امتی نینگ همکارلیگی و تاتوو یششینی ترغیب قیلهدی. مذهب اساسیده هر قندهی کمسیتیش یاکه نزاع چیقرووچی حرکت عدالت تمایللریگه ضددیر»، دېییلهدی.
مرکز ینه شونی قۉشیمچه قیلهدیکی، طالبان اۉزینی عمل قیلهیاتگنینی دعوا قیلهدیگن حنفی فقهده هم اۉزباشیمچهلیک بیلن حبسگه آلیش، باشقه دیني مراسملرنی تحقیرلش و عبادتلرگه تۉسقینلیک قیلیش نینگ هېچ قندهی شرعي اساسی یۉق.
مذکور مرکز طالباندن شیعهلر و باشقه دیني آزچیلیکلرنینگ مراسملریگه قۉییلگن آرتیقچه چېکلاولرنی زودلیک بیلن بېکار قیلیشنی، اولرنینگ دیني رمزلری و مقّدس جایلرینی حرمت قیلیشنی همده اوّلگی ترتیب اساسیده خلق ارا مجبوريتلرنی انابتگه آلگن حالده دیني مراسملرنی اۉتکزیشگه رخصت بېریشنی طلب قیلدی.
شونینگدېک، مرکز برچه دیني آزچیلیکلر اوچون خوفسیزلیک و دیني اېرکینلیکنی تأمینلشنی همده طالبلر تامانیدن جاري اېتیلگن چېکلاولر یوزهسیدن بیرلشگن ملتلر تشکیلاتینینگ افغانستانگه کمکلشیش ادارهسی (یوناما) اشتراکیده خلق وکیللری بیلن بیرگهلیکده مستقل، شفّاف و خالص تېرگاو اۉتکزیشنی سۉرهدی.
طالبان افغانستانده حاکمیتنی قَیته اېگهلهگنیدن بویان شیعهلرنینگ محرّم عزدارلیک مراسملریگه کېنگ کۉلملی چېکلاولر جاري اېتیب کېلماقده. گروه بیر نېچه بار شیعهلر یشهیدیگن حدودلردهگی عزدارلیک بیراقلرینی ییغیشتیریب، ییرتیب تشلهگنی حقیده هم خبرلر موجود.
