طالبلرنینگ اخبارات و مدنیت وزیری شیر احمد حقّانينینگ ایتیشیچه، پاکستان تورلی بهانهلر بیلن افغانستاندهگی تینچ اهالینی نشانگه آلماقده. بیراق، اونینگ تأکیدلشیچه، بو پاکستان نینگ غلبهسی بېلگیسی اېمس، چونکه «بیز بۉمبهلرگه اۉرگنیب قالگنمیز».
طالبلر اخبارات و مدنیت وزیری بو سۉزلرنی بوگون (چهارشنبه، ۱۰سرطان) سمنگان ولایتیده ژورنالیستلر بیلن اوچرهشوو چاغیده تیلگه آلگن.
او شوندهی دېدی: «بیز بۉمبهلرگه اۉرگنیب قالگنمیز. بیزگه جوده کۉپ بۉمبهلر تشلنگن، کۉپلب شهیدلر بېرگنمیز. اما کتّه امکانیت و قدرتگه اېگه بۉلگن کوچلرگه هم تسلیم بۉلمهگنمیز.»
شیر احمد حقّاني نینگ تأکیدلشیچه، طالبلر پاکستانگه هم تسلیم بۉلمهیدی. اونینگ فکریچه، پاکستانده بو گروهنی «تسلیم بۉلیشگه» مجبور قیلهدیگن درجهده امکانیت، صلاحیت و ایچکی بیرلیک موجود اېمس.
او، شونینگدېک، اگر پاکستان طالبلرگه قرشی «ظالمانه حرکتلری»نی دوام اېتتیرسه، بو مملکتده ایچکی نزاع و کېلیشماوچیلیکلر کوچهییشی، حتا اونینگ پرچهلنیشیگه آلیب کېلیشی ممکنلیگینی ادعا قیلدی.
پاکستان جاري هفته نینگ یکشنبه آقشامیده ینه پکتيا، پکتیکا و کنر ولایتلریگه هوا هجوملری اویوشتیریب، بونده تحریک طالبان پاکستان (تیتیپی) و جماعت اولاحرار گروهلری نینگ موضعلری نشانگه آلینگنینی بیلدیرگن اېدی.
بیراق طالبان اوشبو هجوملرده تینچ اهالی یشهیدیگن اویلر نشانگه آلینگنی، عاقبتده۳۶ کیشی هلاک بۉلگنی و۱۳۶ کیشی یرهلنگنینی ادعا قیلگن.
مذکور هجوملردن سۉنگ طالبان مدافعه وزیرلیگی کېچه تونده پاکستان نینگ بلوجستان حدودیدهگی «دهیش مرکزلری»گه دران ضربهلری بېرگنینی معلوم قیلدی. اما پاکستان تامانی مملکت هوا حدودیگه کیرگن برچه سادّه درانلر اۉز وقتیده انیقلنیب، اوریب توشیریلگنینی بیلدیردی.
