منبعلرنینگ ایتیشیچه، فاریاب ولایتیده توغیلگن۱۹ یاشلی ییگیت تورکيه و ایران چېگرهسیده قییناققه سالینیشی عاقبتیده جان بېرگن. اونینگ بیلن بیرگه بۉلگن ینه اوچ کیشی همراهی اېسه قۉل و قبیرغهلری سینیشی کبی آغیر جراحتلر آلگن.
بیر منبعنینگ اطلاعات روزگه یوبارگن پیامیده هلاک بۉلگن ییگیت نینگ اسمی امید بۉلیب، او فاریاب ولایتینینگ کوهستان اولسواللیگی یشاووچیسی بۉلگنینی معلوم قیلگن.
منبعنینگ سۉزلریگه کۉره، امید ینه تۉقّیز کیشی بیلن بیر نېچه کون آلدین ایراندن تورکيه چېگرهسی تامان یۉل آلگن. اولر آرارات تاغی آرقهلی تورکيهگه کیریشنی رېجهلشتیرگن.
منبعنینگ بیلدیریشیچه، تورکيه چېگرهچیلری اوشبو مهاجرلرنی تۉختهتیب، قییناققه سالگن.
عیناً شو قییناقلر عاقبتیده امید هلاک بۉلگن. ینه ایکّی کیشی نینگ قۉلی، بیر کیشینینگ اېسه قبیرغهسی سینگن. جبرلنگنلرنینگ برچهسی فاریاب ولایتینینگ کۉهستان اولسواللیگیدن بۉلگن.
منبع نینگ ایتیشیچه، امیدنینگ جسدی سهشنبه کونی ایران نینگ غربي آذربایجان ولایتیدهگی ماکو شهریده اونینگ یقینلریگه تاپشیریلگن و افغانستانگه جۉنهتیلگن. جسد چهارشنبه کونی هرات ولایتیدهگی اسلام قلعه چېگرهسیگه یېتیب کېلگن.
اطلاعات روز اختیاریگه قۉییلگن ویدیوده امیدنینگ جسدیده قییناق ایزلری یقّال کۉرینهدی. جسدگه علاوه قیلینگن معلوماتده اونینگ وفات سنهسی ۲۷-جوزا دېب قید اېتیلگن.
قییناققه اوچرهگن باشقه شخصلرنینگ صورتلری هم نشر اختیاریگه کېلیب توشگن. اولردن بیری نینگ آرقه قِسمیده جراحت و کۉکریش ایزلری انیق کۉرینهدی.
بوندن آلدین هم تورکيه چېگرهسیده افغانستانستانلیکلرنینگ قییناققه سالینگنی و هلاک بۉلگنی حقیده بیر نېچه بار خبرلر ترقهلگن.
شونینگدېک، اَیریم افغانستان مهاجرلری اروپاگه یېتیب باریش یۉلیده آچلیک و ساووق سبب حیاتدن کۉز یومگن یاکه تنه اعضالرینی یۉقاتگن.
افغانستان یشاوچیلری اروپا دولتلریگه یېتیب باریش مقصدیده عادتده ایران آرقهلی ناقانوني روشده تورکيهگه اۉتهدی و او یېردن اروپاگه یۉل آلهدی.
