طالبلر باش وزیری ملا محمدحسن آخوند کابلنینگ سرۉبي اولسواللیگی منطقهسیدهگی «تیزین» درهسیده برپا اېتیلهیاتگن کابل جلال آباد ترانسپورت یۉلینینگ ایکّینچی خطی قوریلیشی بیلن تنیشدی.
طالبلر سۉزلاوچیسی اۉرینباسری حمدالله فطرت بوگون (پنجشنبه، ۱۱-سرطان) ایکس اجتماعي ترماغیده اعلان قیلگن بیاناتیده، ملامحمدحسن آخوندگه فواید عامه وزیری محمد عیسی ثاني و طالبلرنینگ ینه بیر قطار رسميلری همراهلیک قیلگنینی معلوم قیلدی.
طالبلر باش وزیری لایحه بیلن تنیشیش چاغیده گروهنینگ فواید عامه وزیری همده خصوصي شرکتلر باشلیغ و خادملریگه منّتدارلیک بیلدیریب، لایحهنی اۉز وقتیده و صفتلی یکونلش بۉییچه اولرگه «ضرور کۉرسهتمهلر» بېرگن.
اونینگ تأکیدلشیچه، مذکور یۉل قوریلیشی یکونلنگچ، ترانسپورت و ترانزیت ساحهسیده، اهالی نینگ قتناوی همده تېگیشلی حدودلر اقتصادینی مستحکملشده مهم اۉزگریشلر، قولهیلیکلر و ترقیات یوز بېرهدی.
بو طالبلر باش وزیرینینگ بیرار رواجلنتیریش لایحهسی قوریلیش جریانینی ایلک بار بېواسطه باریب کۉریشی حسابلنهدی.
اوّلراق بوندهی لایحهلرنی اساسن اونینگ اقتصادي مسألهلر بۉییچه اۉرینباسری عبدالغنی برادر کۉزدن کېچیرگن یاکه اولرنینگ آچیلیش مراسملریده اشتراک اېتگن.
طالبلر معلوماتیگه کۉره، کابل-جلال آباد ترانسپورت یۉلینینگ ایکّینچی خطی اوچ باسقیچده قوریلماقده.
حاضرده کابلدن جلال آباد تامانگه ۳۲ کیلومترنی تشکیل اېتووچی ایکّینچی قسمی نینگ قوریلیشی ۲۰ فایزگه بجریلگن. ننگرهاردن کابل تامان 22 کیلومتر اوزونلیکدهگی بیرینچی قسمیده هم قوریلیش ایشلری دوام اېتماقده.
طالبلرنینگ بیلدیریشیچه، اوچینچی قسمنی اۉرگنیش و لایحهلش ایشلری هم خصوصي شرکتلر تامانیدن دوام اېتتیریلماقده. اولر یکونلنگهچ، عملي قوریلیش ایشلری باشلنهدی.
