محلي منبعلر پروان ولایتیده یشاوچی۲۷یاشلی بیر ییگیتنینگ افغانستان و اېران چېگرهسیده یوز بېرگن آتیشمه عاقبتیده جان بېرگنینی تصدیقلهدی.
منبعلرگه کۉره، هلاک بۉلگن ییگیت صابر اسملی بۉلیب، پروان ولایتی نینگ جبلاسِراج تومنیدهگی خواجه محمدخیل قیشلاغی استقامت قیلووچیسی اېدی.
منبعلردن بیری صابر سابق حکومت قوراللی کوچلری صفیده خدمت قیلگنینی ایتدی.
بیر منبع نینگ معلوم قیلیشیچه، صابر و اونینگ همراهلری پنجشنبه کونی (۱۱سرطان) نیمروز چېگرهسی آرقهلی ناقانوني روشده ایرانگه اۉتیشگه اورینگن پیتده، اولرنی آلیب کېتهیاتگن موتر افغانستان چېگره منطقهسیده طالبان کوچلری تامانیدن اۉققه توتیلگن.
منبعگه کۉره، اوشبو آتیشمه عاقبتیده صابر هلاک بۉلگن، ینه اوچ کیشی، جملهدن ایکّی کیشی عیال یرهلنگن.
ینه بیر منبع صابرنینگ هلاک بۉلگنینی تصدیقلهدی، بیراق آتیشمهنی عیناً کیم صادر اېتگنی حاضرچه انیق اېمسلیگینی بیلدیردی.
اونینگ ایتیشیچه، صابرنینگ باشیگه اۉق تېککن. شونینگدېک، یرهلنگن اوچ کیشی نینگ هم برچهسی جبلاسِراج تومنیدهگی خواجه محمدخیل قیشلاغی اهالیسی اېکنلیگی معلوم قیلیندی.
منبعنینگ قۉشیمچه قیلیشیچه، صابرنینگ جنازه مراسمی تیناوون (جمعه کونی) اۉتکزیلگن، یرهدارلر اېسه دوالنیش اوچون کابلگه کۉچیریلگن.
سۉنگّی کونلرده نیمروز چېگرهسیده ننگرهار ولایتی نینگ ینه بېش یشاوچیسی هم ایران چېگرهچیلری نینگ اۉق اوزیشی عاقبتیده هلاک بۉلگنی خبر قیلینگن اېدی.
شونینگدېک، خوست ولایتیدهگی ینه بیر منبع ایران-افغانستان چېگرهسیده فرید اسملی بیر ییگیت هوا حرارتی نینگ کېسکین ایسّیقلیگی سبب وفات اېتگنینی معلوم قیلدی.
افغانستاندهگی آغیر اقتصادي وضعیت و ایشسیزلیک طفیلی کۉپلب یشاوچی ایش ایزلب ایرانگه یۉل آلماقده.
بیراق ایران افغانستانلیکلر اوچون ویزه بېریشنی چېکلهگنی سببلی، کۉپلب ایش ایزلاوچیلر خوفلی ناقانوني مهاجرت یۉللرینی تنلشگه مجبور بۉلماقده.
