بیرلشگن ملتلر تشکیلاتینینگ انسانپرورلیک یاردملرنی موافقلشتیریش ادارهسی (اوچا) طالبان و پاکستان اۉرتهسیدهگی تۉقنهشوولرده تینچ اهالینینگ نشانگه آلینیشی یوزهسیدن مناسبت بیلدیریب، تینچ اهالی هېچ قچان ماجرا نرخینی تۉلهمسلیگی کېرهکلیگینی تاکیدلهدی.
اوچا بوگون، یکشنبه، ۱۴-سرطان، ایکس اجتماعي ترماغیده نشر قیلگن بیاناتیده زۉروانلیکلر آدملرنینگ حیاتینی ایزدن چیقرهیاتگنینی بیلدیردی.
اوچانینگ افغانستاندهگی و نمایندهلیگی شوندهی یازدی: «زۉروانلیکلر فقط اویلر و آستقورمهلرنی ویران قیلمهیدی. او آدملر حیاتینی ایزدن چیقرهدی، قۉرقوونی کوچهیتیرهدی همده جمعیتنینگ روحي سلامتلیگیگه، اینیقسه بالهلرگه جدّي ضرر یېتکزهدی.»
اوچا ینه شونی تاکیدلهدی: «تینچ اهالی هېچ قچان ماجرا عاقبتلرینی اۉز ذمّهسیگه آلمهسلیگی کېرهک. اولر هر دایم خلقارا انسانپرورلیک حقوق نارملریگه موافق حمایه قیلینیشی لازم.»
سۉنگّی تۉقنهشوولردن جبر کۉرگنلردن بیری- خوست ولایتینینگ اسپیره اولسواللیگی یشاوچیسی اوچاگه شوندهی دېگن:
«هوا هجوملریدن بېری بیز خاطرجمع اوخلهی آلمهیهپمیز. هر قندهی بلند تاووش اۉشه واقعهلر ینه تکرارلنیشیدن قۉرقیتهدی. فرزندلریمیز باشیمیز اوزره اوچاق آوازینی اېشیتیشی بیلن واهمهگه توشهدی.»
تخمیناً بیر آی اوّل، ۱۹-جوزا کونی خوست ولایتی نینگ اسپیره اولسواللیگی منه قیشلاغیده محلي فقرا ببری نینگ اویی تونگی ساعت۱۲:۲۰ده پاکستان حربي-هوا کوچلری تامانیدن بامباردمان قیلینگن اېدی. هجوم عاقبتیده۹ کیشی هلاک بۉلیب، ینه۱۰ کیشی یرهلنگن.
اۉشه پیتده طالبلرنینگ خوست ولایتی حاکمی مطبوعات سۉزلاوچیسی مستغفر گربز هجومده بیر عیال، بیر اېرکک و۷-۱۰یاشدهگی یېتّی نفر اېمس، سکّیز نفر باله هلاک بۉلگنینی معلوم قیلگن اېدی. بیرلشگن ملتلر تشکیلاتی نینگ افغانستاندهگی یاردم ادارهسی (یوناما) هم پاکستان نینگ پکتيا، پکتیکا و کنر ولایتلریگه اویوشتیرگن سۉنگگی هجوملری عاقبتیده۲۸ نفر تینچ اهالی هلاک بۉلگنی،۴۹ نفر باشقه فقرا اېسه جراحت آلگنینی تصدیقلهدی. جراحتلنگنلر نینگ برچهسی تینچ اهالی بۉلگن.
