محلي منبعلرنینگ اطلاعات روزگه معلوم قیلیشیچه، کنر دریاسیده علیحده حادثهلرده بیر عیال و بیر یاش ییگیت چۉکیب، حیاتدن کۉز یومگن.
بیرمنبع نینگ ایتیشیچه، هر ایکّی حادثه تیناوون (یکشنبه، ۱۴سرطان) توشدن کېین یوز بېرگن.
منبع معلوماتیگه کۉره، طالبان اعضالریدن بیرینینگ خاتینی بۉلگن عیال کنر ولایتی مرکزی اسعدآباد شهریده دریاگه چۉکیب کېتگن، بیراق اونینگ جسدی هنوز تاپیلمهگن.
ینه بیر حادثهده اېسه غازی آباد اولسواللیگیده بیر یاش ییگیت دریاگه چۉکیب هلاک بۉلگن. اونینگ جسدی عایله اعضالریگه تاپشیریلگن.
حاضرگچه کنر ولایتیدهگی طالبلرنینگ محلي رسميلری اوشبو حادثهلر یوزهسیدن ایضاح بېرمهگن.
افغانستانده هوا حرارتی نینگ کېسکین آشیشی بیلن بیرگه دریالر و سوو انبارلریده چۉکیب کېتیش عاقبتیدهگی اۉلیملر سانی هم آرتماقده.
طالبلرنینگ طبيعي آفتلرگه قرشی کورهش باشقرمهسی معلوماتیگه کۉره، جاري میلادي ییل نینگ دستلبکی ایکّی یریم آییده مملکت بۉیلب 75 کیشی سووگه چۉکیب هلاک بۉلگن. بو کۉرستکیچ افغانستانده اۉرتهچه هر کونی بیر کیشی سووده چۉکیب وفات اېتهیاتگنینی انگلهتهدی.
