بیرلشگن ملتلر تشکیلاتینینگ انسانپرورلیک یاردم ایشلرینی موافقلشتیریش باشقرمهسی (اوچا) افغانستاندهگی دوام اېتهیاتگن بحران اېندی خلق ارا عامهوي اخبارات واسطهلرینینگ باش موضوعی بۉلمهی قالگنینی، بیراق میلیونلب عایلهلر اونینگ عاقبتلرینی هر کونی باشدن کېچیرهیاتگنینی معلوم قیلدی.
اوچا بوگون (دوشنبه، ۱۵سرطان) ایکس اجتماعي ترماغیده اعلان قیلگن بیاناتیده شوندهی دېدی: «افغانستاندهگی بحران اېندی سرلوحهلرده بۉلمسلیگی ممکن، اما اونینگ تأثیری هر کونی میلیونلب عایلهلر تامانیدن حس قیلینماقده.»
تشکیلات نینگ تأکیدلشیچه، عایلهلرنینگ شاشیلینچ احتیاجلرینی قاندیریش اولرنینگ تورموش شرایطی یخشیلنگنینی انگلهتمهیدی.
اوچا: «تیکلنیش فقط شاشیلینچ احتیاجلرنی قاندیریش بیلنگینه چېکلنمهیدی. او تیریکچیلیک منبعلرینی قَیته تیکلش، اهالینینگ برداشلیلیگینی کوچهیتیریش و جماعهلرگه امیدلی کېلهجکنی برپا اېتیشده کمک بېریشنی انگلهتهدی،» دېیه قید اېتدی.
تشکیلات پکتیکا ولایتینینگ گيان اولسواللیگیده یشاوچی بیر قیشلاق عیالینینگ سۉزلرینی هم کېلتیردی. اونینگ ایتیشیچه، عایلهسی فرزندلرینی تۉیدیریشده جدّي قیینچیلیکلرگه دوچ کېلماقده.
عیال شوندهی دېگن: «اېریمگه ایتدیم، اگر اېندی اېچکیلریمیزنی باقیشگه هم قُربیمیز یېتمسه، اولرنی ساتیشیمیز کېرهک. چونکه اۉزیمیز هم فرزندلریمیزنینگ قارنینی تۉیدیریشگه قیینهلهیهپمیز.»
افغانستانده قشّاقلیک و ایشسیزلیک، شونینگدېک، کېتمه-کېت قورغاقچیلیک کبی اقلیم اۉزگریشلری عاقبتلری وضعیتنی ینه-ده آغیرلشتیرگن. خلقارا تشکیلاتلر بو حالتنی منتظم روشده «بحران» دېب بهالب کېلماقده.
بیرلشگن ملتلر تشکیلاتی افغانستاندهگی قریب ۲۲ میلیون محتاج اهالی نینگ شاشیلینچ احتیاجلرینی قاپلش اوچون۱.۷ میلیارد امریکا دالردن آرتیق مبلغ سۉرهگن اېدی. بیراق ییل نینگ بیرینچی یرمی یکونیگه کېلیب، اوشبو مبلغ نینگ اتیگی قریب ۱۶فایزی مالیهلشتیریلگن.
بیرلشگن ملتلر تشکیلاتیگه قرهشلی تشکیلاتلر اوّل هم تأکیدلهگنیدېک، روسيه-اوکراین اوروشی، غزه اوروشی همده ایران–اسرایل ماجراسی یانیده افغانستان خلق ارا همجمعیت اعتباریدن چېتده قالماقده. بو ماجرالر گلوبل مقیاسده اوستوار اهمیت کسب اېتگنی سببلی افغانستاندهگی انسان پرورلیک بحرانگه اجرهتیلهیاتگن اعتبار سېزیلرلی درجهده کمهیگن.
