افغانستانگه سفر قیلگن بیرلشگن ملتلر تشکیلاتی قاچقینلر ایشلری بۉییچه عالي کمیساری برهم صالح طالبلر چېکلاولریگه اشاره قیلیب، افغانستاننینگ رواجلنیشی عیاللر و قیزلرسیز ممکن اېمسلیگینی ایتدی.
بیرلشگن ملتلر تشکیلاتینینگ قاچقینلر ایشلری بۉییچه عالي کمیساری بوگون (دوشنبه، ۱۵-سرطان) فرانسه خبرگزارلیگیگه بېرگن مصاحبهسیده شوندهی دېدی: «بیز بو جمعیتنینگ برچه صلاحیتیدن فایدهلنیشیمیز کېرهک. بو نینگ اوچون اېرککلر، عیاللر، اۉغیل بالهلر و قیزلرنینگ برچهسی اۉز مملکتی کېلهجگینی برپا اېتیشده اشتراک اېتیشی ضرور.»
او شونینگدېک، طالبلر تامانیدن افغانستانلیک عیال خادملرنینگ بیرلشگن ملتلر تشکیلاتی ادارهلریده ایشلشیگه قۉییلگن چېکلاوینی تیلگه آلیب، شوندهی دېدی: «شبههسیز، بو حالت افغانستان خلقیگه خدمت کۉرسهتیش امکانیتیمیزنی جدّي درجهده چېکلب قۉیدی.»
آقای صالح یقین کونلرده کابلده طالبلر رسميلری بیلن اوچرهشیشی و اولردن افغانستان عیاللرینینگ بیرلشگن ملتلر تشکیلاتی ادارهلریده ایشلشیگه قۉییلگن چېکلاولرنی بېکار قیلیشنی سۉرهشی کوتیلماقده.
او فرانسه خبرگزارلیگیگه: «افغانستان قۉللب-قوّتلشگه لایق. اما بو یاردمنی کۉرسهتیش اوچون همکارلیک و اشتراک ضرور»، دېدی.
شونینگدېک، بیرلشگن ملتلر تشکیلاتینینگ ترقیات دستوری باشلیغی الکساندر دی کرو افغانستاندهگی دوام اېتهیاتگن بحرانلرگه تۉختهلیب: «بو وضعیتنی یېنگیب اۉتیش اوچون همهنینگ اشتراکی کېرهک. جمعیتدهگی برچه استعدادلردن فایدهلنیش لازم و بو اېرککلر بیلن بیر قطارده عیاللرنی هم اۉز ایچیگه آلهدی»، دېدی.
فرانسه خبریگه کۉره، او بو سۉزلرنی بلخ ولایتی نینگ نهری شاهي اولسواللیگیدهگی قالین تۉقیش مرکزیگه تشریفی چاغیده ایتگن. مذکور مرکزده افغانستانگه قَیتگن عیاللر ایش قیلماقده.
بیرلشگن ملتلر تشکیلاتی ترقیات دستوری رهبری طالباندن عیاللر و قیزلرنینگ تعلیم آلیش، ایشلشهمده تدبیرکارلیک بیلن شغللنیش حقوقلرینی کفالتلشنی طلب قیلدی.
طالبان افغانستانده حاکمیتنی قَیته اېگهلهگنیدن بویان عیاللر و قیزلرنینگ تعلیم آلیشی همده ایشلشینی منع قیلدی، اولرنینگ جمعیتدهگی اشتراکیگه کېنگ کۉلملی چېکلاولر جاري اېتگن.
بو گروه، شونینگدېک، افغانستان عیاللرینینگ بیرلشگن ملتلر تشکیلاتی ادارهلریده ایشلشینی هم منع قیلگن بۉلیب، خلقارا همجمعیتنینگ کۉپ باره مراجعتلریگه قرهمهی، حاضرگچه اوشبو تعقیقنی بېکار قیلمهگن.
