طالبلرنینگ اېکینچیلیک، سوغاریش و چارواچیلیک وزیری عطاءلله عمری رسمي هیئت باشچیلیگیده هندستانگه جۉنب کېتدی.
طالبلر اېکینچیلیک وزیرلیگی بوگون (سهشنبه، ۱۶-سرطان) ترقهتگن بیاناتده، عمری اېکینچیلیک و چارواچیلیک ساحهسیده ایکّی تامانلهمه همکارلیکنی کېنگهیتیریش مقصدیده اوشبو سفرنی عملگه آشیرهیاتگنینی معلوم قیلدی.
سفر دوامیده عمری هندستان رسميلری بیلن اېکینچیلیک ساحهسیدهگی همکارلیک، تجربه المشیش، زمانهوي اېکینچیلیک تکنالوژيلری همده قیشلاق خۉجهلیگی محصولاتلری صادرات و وارداتینی رواجلنتیریش مسألهلرینی بحث قیلیشی رېجهلشتیریلگن.
طالبلر و پاکستان اۉرتهسیدهگی کېسکینلیک کوچهییب، حربي تۉقنهشوولر باشلنگنیدن سۉنگ، اوشبو گروه هندستان بیلن سیاسي و تجارت علاقهلرینی ینه-ده مستحکملهدی.
سۉنگّی اۉن آی ایچیده عطاءلله عمری هندستانگه تشریف بویورگن طالبلرنینگ تۉرتینچی وزیری حسابلنهدی.
بوندن آلدین طالبلر تشقی ایشلر وزیری امیرخان متقي ۲۰۲۵-ییل اکتوبر آییده آلتی کونلیک تشریف بیلن هندستانگه بارگن اېدی.
اۉشه ییل نوامبر آییده طالبلر نینگ صناعت و تجارت وزیری نورالدین عزیزی دهلیگه تشریف بویوردی.
آرهدن بیر آی اۉتیب، طالبلر پاکستاندن دارو-درمان وارد قیلیشنی تعقیقلهگنیدن سۉنگ، گروه نینگ ساغلیقنی سقلش وزیری نور جلال جلالي ساغلیقنی سقلش، طبیات و فارمسیون ساحهلریدهگی همکارلیکنی محاکمه قیلیش اوچون هندستانگه سفر قیلدی.
هندستان هم طالبلر بیلن علاقهلرنی ایلیق کوتیب آلدی. دهلی ۲۰۲۵ییل اکتوبر آییده، امیرخان متتقي نینگ تشریفیدن سۉنگ، کابلگه مؤقت ایشلر وکیلینی یوباردی و افغانستان اېلچیخانهسینی طالبانگه تاپشیردی.
جاري ییل جنوری آییده اېسه هندستان طالبان دیپلوماتی نور احمد نورنی دهلیدهگی افغانستان اېلچیخانهسی باشلیغی صفتیده قبول قیلدی.
