انسان حقلری تشکیلاتینینگ جَنوبي آسیا بۉییچه تدقیقاتچیسی فرشته عباسي اروپا اتفاقی طالبلر بیلن افغانستان مهاجرلرینی مجبوري روشده افغانستانگه قَیتریش مسألهسیده هېچ قندهی کېلیشووگه اېریشمسلیگی کېرهکلیگینی ایتدی.
عباسي بوگون (۱۷-سرطان، چهارشنبه) نشر قیلگن بیاناتیده بوندهی کېلیشوو دېپورت قیلینگن شخصلرنی طالبان تامانیدن تعقیب و سوءاستعماللرگه دچار بۉلیش خوفی آستیده قالدیریشینی تأکیدلهدی.
اونینگ سۉزلریگه کۉره، اروپا اتفاقی 22-جون کونی بروکسلده اۉتکزیلگن اوچرهشوونی “تخنیکي ییغیلیش” دېب تعریفلهگن بۉلسه، طالبان اونی “تاریخي اوچرهشوو” و اروپا اتفاقیگه اعضا دولتلر بیلن کنسوللیک علاقهلرینی یۉلگه قۉییش سری مهم قدم صفتیده بهالهگن.
عباسينینگ ایتیشیچه، اگر اروپا اتفاقی و اونگه اعضا دولتلر افغانستانگه عاید سیاستینینگ ایشانچلی بۉلیشینی ایستهسه، افغانستانگه برچه مجبوري قَیتریشلرنی تۉختهتیشی لازم.
او اروپا اتفاقینی طالبلر بیلن ملاقاتدن افغانستان خلقی نینگ حقوقلرینی حمایه قیلیش و طالباننی جوابگرلیککه تارتیش اوچون باسیم واسطهسی صفتیده فایدهلنیشگه، اونی خوفلی حدودگه مجبوري قَیتریشلرنی عادتي حالگه ایلنتیریش اوچون ایشلهتمسلیککه چقیردی.
خانم عباسي شوندهی دېدی: افغانستان هېچ کیمنی مجبوري قَیتریش اوچون خوفسیز مملکت اېمس. طالبان خوفسیزلیک کوچلری مجبورن قَیتریلگن شخصلرنی حبسگه آلگنی و قییناققه سالگنینی کۉرستووچی ایشانچلی دلیللر موجود.”
اونینگ تأکیدلشیچه، خلقارا حقوق دولتلرگه آدملرنی تعقیب، قییناق، باشقه شفقتسیز معامله یاکه حیاتیگه رئال خوف موجود بۉلگن جایلرگه مجبورن قَیتریشنی تعقیقلهیدی.
عباسينینگ قید اېتیشیچه، افغانستانگه قَیتگنلرنینگ معمالری فقط تعقیب و زۉرآورلیک بیلن چېکلنمهیدی. اولر باشپناه و ضرور منبعلر یېتیشمسلیگی سببلی تیریک قالیش اوچون هم کورهشیشگه مجبور بۉلماقده.
انسان حقوقلر تشکیلاتی تدقیقاتچیسی اروپا اتفاقینی طالبان بیلن مناسبتلر سیاستینی قَیته کۉریب چیقیشگه چقیردی.
اونینگ فکریچه، عملدهگی سیاست “چوقور ضدیت”نی نمایان اېتماقده. چونکه بیر تاماندن طالبلرنینگ حقوقبوزرلیکلری قارهلنسه، ایکّینچی تاماندن آدملرنی طالبان نظارتی آستیدهگی خوفلی حدودگه دېپورت قیلیش بۉییچه همکارلیک قیلینماقده.
اروپا اتفاقی 16 کون اوّل بروکسلده طالبان تشقی ایشلر وزیرلیگی مطبوعات کاتبی عبدالقهار بلخي باشچیلیگیدهگی بېش کیشیلیک هیئتنی قبول قیلگن اېدی.
اوچرهشوو مېزبانی بۉلگن اروپا کمیسیونینینگ معلوم قیلیشیچه، هیئت اعضا دولتلر سۉراویگه بناءً افغانستانگه مهاجرلرنی قَیتریش بیلن باغلیق “تخنیکي مسألهلر”نی محاکمه قیلیش اوچون تکلیف اېتیلگن.
بیراق بلخي اوچرهشوو یکونیده اونی “تاریخي اوچرهشوو” دېب اتهب، اروپا اتفاقیگه اعضا دولتلر بیلن کنسوللیک همکارلیگی یۉلگه قۉییلیشینی معلوم قیلگن.
اروپاده استقامت قیلهیاتگن افغانستان مهاجرلری همده بیر قطار انسان حقوقلری تشکیلاتلری اروپا اتفاقی نینگ طالبان بیلن بوندهی ملاقاتی و افغانستان مهاجرلرینی افغانستانگه دېپورت قیلیش سیاستینی تنقید قیلیب، اونی اۉزگرتیریشگه چقیرماقده.
