جیو نیوز پاکستان امنیتی منبعلریگه تهیهنیب خبر بېریشیچه، بلوچستانده قوراللی گروهلرگه قرشی اۉتکزیلگن عملیات دوامیده پاکستان نینگ ۱۱ خوفسیزلیک خادیمی اۉلدیریلگن.
تلویزیون بوگون (۱۷-سرطان، چهارشنبه) نشر قیلگن خبرده اوشبو عملیات دوامیده ۱۹کیشی جنگری هم اۉلدیریلگنی ایتیلهدی.
خبرگه کۉره، عملیات بلوچستاندهگی «ان-۲۵» عمومی قناو یۉل بۉیلب اۉتکزیلگن. پاکستان رسميلری بو حدودده پاکستان طالبانی حرکتی (تیتیپی) جنگریلری یۉلاوچیلر و محلي اهالیدن تاولمچیلیک قیلهیاتگنینی بیلدیرگن.
مذکور عملیات جنگریلر بلوچستاننینگ زریات اولسواللیگیده نظارت-اۉتکزیش پوستهسیگه هجوم قیلیب، تۉقّیز نفر پاکستانلیک پولیسنی اۉلدیرگنی و ینه بېش نفرینی اۉغیرلب کېتگنیدن سۉنگ باشلنگن.
پاکستانده طالبان ۲۰۲۱-ییلده افغانستانده حاکمیتنی اېگهلهگنیدن بویان قوراللی هجوملر کېسکین کۉپهیگن. اینیقسه، افغانستان بیلن چېگرهداش خیبر پختونخوا و بلوچستان ایالتلری بوندهی هجوملردن اېنگ کۉپ ضرر کۉرگن حدودلر حسابلنهدی.
پاکستان اوردوسی جنگریلر هجوملریگه جوابن بیر نېچه بار افغانستان منطقهدهگی نشانلرگه ضربهلر بېرگن و مملکتنینگ تورلی ولایتلرینی بامباردمان قیلگن.
پاکستان حکومتی افغانستاندهگی طالباننی قوراللی گروهلر و ترورچی تشکیلاتلرنی قۉللب-قوّتلشده عیبلب، تیتییرهبرلری و اعضالری افغانستان توپراغیده باشپناه تاپگنی همده هجوملرینی شو یېردن رېجهلشتیرهیاتگنینی تأکیدلهیدی.
طالبان اېسه بو عیبلاولرنی رد اېتیب، افغانستان توپراغیدن باشقه دولتلرگه قرشی فایدهلنیشگه هېچ بیر گروهگه رخصت بېریلمسلیگینی بیلدیرهدی.
