افغانستان ملي قرشیلیک جبههسی رهبری احمد مسعودنینگ ایتیشیچه، طالبان اۉزینی یگانه مقابل صفتیده کۉرسهتیش و مخالفلرینی ترقاق همده خلق تهیهنچیگه اېگه اېمسدېک تصویرلشگه اورینماقده. اونینگ تأکیدلشیچه، طالبان نینگ حقیقي مقابلی علیحده بیر شخص اېمس، بلکه قانوني سیاسي تیزیمدیر.
مسعود بو سۉزلرنی جمعه کونی (۱۹-سرطان) سابق پارلمان وکیلی سید حسین انوري وفاتی نینگ اۉنینچی ییللیگیگه بغیشلنگن آنلاین ییغیلیشده ایتدی.
اونینگ سۉزلریگه کۉره، «طالبانگه مقابل یۉق» دېگن دعوا رقیبلر تامانیدن ترغیب قیلینهیاتگن روایتدیر.
مسعودنینگ تأکیدلشیچه، طالبلرنینگ مقابلی بیرار شخص اېمس، بلکه سیلاو و قانوني دولت تیزیمیدیر.
او شوندهی دېدی: «طالبلرنینگ مقابلی احمد یاکه محمود اېمس، بلکه برچهمیز چین دلدن ایشانهدیگن جریاندیر. بو جریانده اۉتیش حکومتی توزیلهدی، قانون ایشلب چیقیلهدی، اساسی قانون لویه جرگهسی اۉتکزیلهدی و سیلاولر تشکیل اېتیلهدی. نتیجهده خلق تامانیدن قبول قیلینگن قانوني حکومت ایش باشلهیدی.»
ملي قرشیلیک جبههسی رهبری ینه بیر ترغیب قیلینهیاتگن روایت مخالفلرنینگ «خلق آرهسیده تهیهنچی یۉق» دېگن دعوا اېکنینی ایتدی.
اونینگ سۉزلریگه کۉره، رقیبلر: «بیر گروه آدملر خلق قۉللاویگه اېگه بۉلمهگنی اوچون مملکتنی ترک اېتدی»، دېب دعوا قیلماقده. معود اېسه بونگه جوابن: «کیم نینگ قنچه آوازی بارلیگینی انیقلش اوچون سیلاو قوتیسی قۉییلگنمی؟» دېدی.
مسعودنینگ ایتیشیچه، اگر سیلاو اۉتکزیلسه، مارشال عبدالرشید دۉستم طالباندن کۉپراق آواز آلهدی.
او شوندهی دېدی: «مارشال دۉستم سیلاوده اشتراک اېتسه، بیرار طالب اونینگ اوستیدن غلبه قازانیشی ممکن اېمس.»
مسعود نینگ تأکیدلشیچه، طالبان مخالفلرینی ترقاق و بۉلینیب کېتگن قیلیب کۉرسهتیشگه اورینماقده، حالبوکه اولر عمومي تمایل و قدریتلرگه صادقدیر.
او دېدی: «طالبانگه قرشی مخالفلر ترقاق اېمس. بیز بیرلشگنمیز و عمومي تمایللر همده قدریتلرگه ایشانهمیز.»
مسعود بوندهی «رقیبلر یرهتگن روایتلر»گه نسبتاً هوشیار بۉلیش و افغانستاننی قوتقریش نینگ یگانه یۉلی – خلق نینگ اراده و قرار قبول قیلیش حقوقینی قَیتریش اوچون حرکت قیلیش ضرورلیگینی تأکیدلهدی.
اونینگ سۉزلریگه کۉره، بو ترغیباتلر خلقنی امیدسیزلیککه توشیریش، خلقارا همجمعیتنی اېسه مخالفتگه ایشانچسیز قیلیش و مخالفلر نینگ امکانیتلرینی چېکلش مقصدیده ترقهتیلماقده.
بو آرهده طالببز طرفدارلری و یوقاری مرتبهلی عملدارلری بیر نېچه بار بو گروه نینگ افغانستانده سیاسي مقابلی یۉقلیگینی تأکیدلب کېلگن.
جملهدن، طالبلرنینگ انرژی و سوو وزیری عبدالطیف منصور همده افغانستان شخصلری بیلن علاقهلر کمیسیونی رهبری شهاب الدین دلاور بو دعوانی آچیقچهسیگه تکرارلهگن.
عبداللطیف منصور ایکّی ییل اوّل ویانا اوچرهشووی بیلن بیر وقتده خلق ارا همجهعیت هم طالبان نینگ مقابلی یۉقلیگینی تن آلگنینی دعوا قیلگن.
