فاریاب ولایتینینگ سابق والیسی نقیبالله فایق طالبلرنینگ امر به معروف و نهی از منکر وزیری خالدحنفینینگ اۉزبېکستاندهگی اسلام حقیدهگی بیاناتیگه کېسکین مناسبت بیلدیریب، اسلامنی قندهارده اۉتیرگن طالبلر رهبرینینگ تلقینلری و فرمانلری بیلن اۉلچب بۉلمسلیگینی تأکیدلهدی.
فایق حنفینینگ «اۉزبېکستانده اسلامدن فقط نامیگینه قالگن»، دېگن سۉزلریگه جوابن، اسلام «قندهارده اۉتیرگن اۉزینی امیرالمؤمنین دېب اتهیاتگن شخصنینگ قبیله عرف-عادتلریگه دیني توس بېرووچی فرمانلری اېمس»، دېدی.
او طالبلرنی اسلامنی چېکلاولر و خلقنی باستیریشنی آقلش واسطهسیگه ایلنتیرگنلیکده عیبلب، شوندهی دېدی: «اسلامده عدالت طلب قیلیب ناراضیلیک بیلدیرگن عیاللرنی حبسگه آلیش یاکه اولرنی امر به معروف قماقخانهلریده زۉروانلیک و تجاوزگه دچار قیلیش حقیده هېچ قندهی حکم یۉق.»
فاریابنینگ سابق والیسی ینه طالبلر سیاستینی تنقید قیلیب، «طالبلرنینگ قبیلهوي اسلامیده» قیزلر تعلیم آلیش حقوقیدن، تورلی ملتلر دولت باشقروویده اشتراک اېتیش حقوقیدن، ولایتلر اهالیسی طبيعي بایلیکلردن فایدهلنیش اولوشیدن همده اهالی ظلم، فساد، زۉروانلیک و باش کېسیش سیاستیگه قرشی ناراضیلیک بیلدیریش حقوقیدن محروم اېتیلگنینی ایتدی.
فایق اۉزبېکستان حقیده سۉز یوریتر اېکن، بو مملکتده اسلام حاکمیتنی قۉلگه کیریتیش یاکه خلقنی باستیریش واسطهسی اېمسلیگینی، عکسینچه، عدالت، ترقیات و دیني اېرکینلیک تأمینلنگنینی تأکیدلهدی.
اونینگ ایتیشیچه، اۉزبېکستانده مکتبلر برچهگه آچیق، اقتصادي ترقیات دوام اېتماقده، کۉچهلرده تیلنچیلر دېیرلی اوچرهمهیدی، آدملر اېسه هېچ قندهی مجبورلاوسیز، فقط اللهگه بۉلگن محبت طفیلی مسجدلرنی نمازخوانلر بیلن تۉلدیرماقده.
طالبلر نینگ امر به معروف و نهی از منکر وزیری خالد حنفی تیناوون «اۉزبېکستانده اسلامدن فقط نامیگینه قالگن»، دېیه بیانات بېرگن اېدی. مذکور سۉزلر اجتماعي ترماقلرده و افغانستاننینگ قطار سیاسي سیمالری آرهسیده کېنگ بحث و تنقیدلرگه سبب بۉلدی.
