طالبلر نظارتی آستیدهگی احصائیه و معلومات ادارهسینینگ معلوم قیلیشیچه، جاري ییلده افغانستانده سوغاریلهدیگن و للمی اېکین میدانلری ۱۴۰۴-ییلگه نسبتاً قریب۱۰.۲فایزگه آشگن.
اداره معلوماتیگه کۉره، جاري ییلده مملکت بۉیلب جمعی اوچ میلیون هکتاردن آرتیق زراعتی یېرلری اېکیلگن بۉلیب، شوندن۲.۱میلیون هکتاری سوغاریلهدیگن،۸۷۴ مینگ هکتاری اېسه للمی یېرلردن عبارت.
طالبلر احصائیه و معلومات ادارهسی حساباتیگه کۉره، سوغاریلهدیگن اېکین میدانلری۳فایز، للمی اېکین میدانلری اېسه۳۳ فایز آشگن.
ادارهنینگ تأکیدلشیچه، «بو اۉسیش اۉز وقتیده یاغگن یامغیرلر و جاري ییلدهگی قولهی اقلیم شرایطی نتیجهسیدیر.»
حساباتده ایتیلیشیچه، ۱۴۰۵-ییلده اېنگ کتّه سوغاریلهدیگن اېکین میدانی هلمند ولایتیده قید اېتیلگن بۉلیب، او۲۶۲ مینگ هکتارگه یقین یېرنی تشکیل اېتگن. اوندن کېین قندهار۱۶۳مینگ هکتار، هرات ۱۵۷ مینگ هکتار و قندوز۱۳۶مینگ هکتار سوغاریلهدیگن اېکین میدانیگه اېگه بۉلگن.
طالبان ادارهسی، شونینگدېک، اېنگ کتّه للمی اېکین میدانی تخار ولایتیده قید اېتیلگنینی بیلدیریب، او یېرده 157 مینگ هکتار للمی یېر موجودلیگینی معلوم قیلگن. اوندن کېین بدخشان۱۱۶ مینگ هکتار، هرات ۱۱۳مینگ هکتار، سرپل ۸۶ مینگ هکتار و بادغیس 85 مینگ هکتار للمی اېکین میدانیگه اېگه بۉلگن.
اداره نینگ قۉشیمچه قیلیشیچه،۱۴۰۴ و ۱۴۰۵-ییللر کۉرستکیچلری تققاسلنگنده، سوغاریلهدیگن اېکین میدانلری نینگ اېنگ کتّه اۉسیشی هرات، غزنی، زابل، فراه و قندهار ولایتلریده، للمی اېکین میدانلری نینگ اېنگ کتّه اۉسیشی اېسه تخار، سرپل، جوزجان و بدخشان ولایتلریده قید اېتیلگن.
طالبان احصائیه و معلومات ادارهسی اوشبو معلوماتلر مصافهدن زاندلش «ریموت سنسنگ» تکنالوژيسی و صنعي یۉلداش تصویرلری اساسیده تیارلنگنینی بیلدیرگن.
افغانستان کېتمه-کېت بیر نېچه ییللیک قورغاقچیلیکدن سۉنگ جاري هجري-شمسي ییلده یاغینگرچیلیک نینگ نسبتاً کۉپهییشیگه گواه بۉلدی. بیراق کوچلی یامغیرلر و کوتیلمهگن تاشقینلر مملکت نینگ تورلی ولایتلریده اهالیگه ضرر یېتکزیب، کۉپلب اېکین میدانلری نینگ ویران بۉلیشیگه سبب بۉلدی.
