طالبلر تشقی ایشلر وزیرلیگینینگ معلوم قیلیشیچه، بوگون، چهارشنبه، ۲۴-سرطان، طالبلر و ایران اۉرتهسیدهگی قۉشمه قنسوللیک کمیتهسی نینگ بېشینچی ییغیلیشی بۉلیب اۉتدی.
وزیرلیک بیاناتیگه کۉره، ییغیلیش طالبلر تشقی ایشلر وزیری نینگ مالی و اداری مسألهلر بۉییچه اۉرینباسری محمد نعیم همده ایران تشقی ایشلر وزیرینینگ قنسوللیک ایشلری بۉییچه اۉرینباسری وحید جلالزاده رئیسلیگیده اۉتکزیلدی.
بیاناتده ایتیلیشیچه، تامانلر ییغیلیشده مهاجرلر معمالری، قنسوللیک خدمتلری و باشقه تېگیشلی مسألهلرنی باتفصیل بحث قیلیب، اۉزارا منفعتلرگه عاید فکر المشدیلر.
طالبلر تشقی ایشلر وزیرلیگیگه کۉره، تامانلر موجود معمالرنی حل اېتیشدهگی همکارلیکنی کوچهیتیریش و قنسوللیک ساحهسیدهگی علاقهلرنی کېنگهیتیریش مقصدیده قۉشمه کمیته ییغیلیشلرینی کېلگوسیده هم منتظم دوام اېتتیریشگه کېلیشیب آلدیلر.
ایران تشقی ایشلر وزیرینینگ قنسوللیک ایشلری بۉییچه اۉرینباسری دوشنبه کونی کابلگه کېلگن اېدی. او اوّلراق طالبان تشقی ایشلر وزیری امیرخان متقي بیلن ایکّی تامانلهمه مناسبتلر، چېگره همکارلیگی و قنسوللیک مسألهلری یوزهسیدن هم مذاکره اۉتکزگن.
طالبلر حاکمیتنی قَیته اېگهلهگنیدن بویان ایران اوشبو گروه بیلن کېنگ کۉلملی سیاسي و اقتصادي علاقهلرنی یۉلگه قۉیگن همده افغانستاننینگ ایراندهگی اېلچیخانهسی و قنسوللیکلرینی طالبلر نمایندهلریگه تاپشیرگن.
شونینگدېک، ایران نینگ کابلدهگی اېلچیخانهسی و افغانستان نینگ بیر نېچه ییریک شهرلریدهگی قنسوللیکلری فعالیتینی دوام اېتتیرماقده. بیراق اولرنینگ خدمتلری، جملهدن، افغانستان یشاوچیلریگه ویزه بېریش چېکلنگن.
حاضرده ایران ویزهلرینی افغانستان یشاوچیلریگه عادتي ترتیبده بېریش تۉختهتیلگن. ویزهلر فقط ایران ایش بېرووچیلریدن تکلیفنامهگه اېگه شخصلر، ایرانگه یقین سیاسي، دیني و مدني همده طالبلر منصبدارلریگه بېریلماقده.
