بیرلشگن ملتلر تشکیلاتی عیاللر بۉلیمینینگ معلوم قیلیشیچه، افغانستاندهگی عیاللرنی قوّتلاوچی۷۴ ته تشکیلات فعالیتی اۉرگنیلگچ، اولرنینگ یرمیدن کۉپی خلق ارا مالیوي یاردملرنینگ قیسقریشی سبب یاپیلیش خوفی آستیده اېکنی انیقلنگن.
مذکور تشکیلات پنجشنبه کونی (۲۵-سرطان) افغانستاندهگی عیاللر تشکیلاتلری نینگ حالتی بۉییچه نوبتدهگی حساباتینی اعلان قیلدی.
حساباتده عیاللرنی قۉللب-قوّتلاوچی ۷۴ته تشکیلات نینگ مالی احوالی و فعالیتی تحلیل قیلینگن.
بیرلشگن ملتلر تشکیلاتی عیاللر بۉلیمی نینگ تأکیدلشیچه، اوشبو تشکیلاتلر اوچته اساسي معماگه دوچ کېلماقده: خلقارا مالی یاردملر نینگ قیسقریشی، ایشگه یاللشگه قۉییلگن تعقیقلر همده طالبلرنینگ عیاللرنینگ اېرکین حرکتلنیشیگه قۉیگن چېکلاولری.
حساباتگه کۉره، بو تشکیلاتلر عیاللر و قیزلر اوچون ساغلیقنی سقلش خدمتلری، روحي-پسیکولوژیگ یاردم، کسبي تعلیم، انسانپرورلیک یاردمی همده درآمد تاپیشگه قرهتیلگن دستورلردن فایدهلنیش نینگ سۉنگگی امکانیتلرینی تأمینلب کېلماقده.
بیراق، ۲۰۲۵ییلده اوشبو تشکیلاتلر نینگ قریب تۉرتدن اوچ قِسمی مالی یاردم نینگ کمهییشیگه دوچ کېلگن. اولرنینگ اوچدن ایکّی قِسمی اېسه قالگن مبلغلری اتیگی آلتی آی یاکه اوندن کم مدتگه یېتیشینی بیلدیرگن.
اۉرگنیلگن۷۴ ته تشکیلاتنینگ قریب۵۰ فایزی۲۰۲۵ییل باشیدن بویان عموماً ینگی مالیوي یاردم آلمهگن. شونینگدېک، اولر نینگ۹۲ فایزی خادملرینینگ بیر قِسمینی ایشدن بۉشهتیشگه مجبور بۉلگن و یاپیلیش خوفی آستیده قالماقده.
مالیهلشتیریش نینگ قیسقریشی و طالبان چېکلاولری عاقبتیده اوشبو تشکیلاتلر خدمت کۉرسهتگن فایدهلنووچیلر نینگ 66 فایزی اېندیلیکده بو خدمتلردن فایدهلنه آلمهیپتی.
بیرلشگن ملتلر تشکیلاتی عیاللر بۉلیمینینگ معلوماتیگه کۉره، تشکیلاتلرنینگ اوچدن ایکّی قِسمی عیاللر تعلیمی و درآمدلرینی قۉللب-قوّتلش دستورلرینی قیسقرتیرگن. ینه ۵۸ فایزی اېسه عیاللرگه نسبتاً زۉروانلیککه قرشی کورهش خدمتلرینی چېکلشگه مجبور بۉلگن.
گزارشده قید اېتیلیشیچه، عیاللر باشچیلیگیدهگی فقرالیک جمعیتی تشکیلاتلریگه نسبتاً قطعي چېکلاولر جاري اېتیلگچ، اولرنینگ اکثریتی فعالیت یۉنهلیشینی اۉزگرتیرگن. اوّللری عیاللرگه نسبتاً زۉرآورلیککه قرشی کورهش، خبردارلیکنی آشیریش، تعلیم همده عیاللر نینگ سیاسي و باشقروو ساحهلریدهگی صلاحیتینی رواجلنتیریش بیلن شغللنگن تشکیلاتلر اېندیلیکده اساسن قیسقه مدتلی لایحهلر و عیاللر اوچون اوی شرایطیدهگی کیچیک بیزنس تشبثلری، جملهدن پرندهچیلیک و دهقانچیلیک فعالیتیگه اعتبار قرهتماقده.
