طالبلرنینگ بدخشان ولایتی امنیه قوماندانلیگی مطبوعات سۉزلاوچیسی احسانالله کامگار یفتل پایین اولسواللیگی مرکزیگه اویوشتیریلگن هجومنی تصدیقلهدی.
طلوع نیوز تامانیدن اعلان قیلینگن اودیو پیامده کامگار هجومنی عملگه آشیرگنلرنی «مسوولیتسیز شخصلر» دېب اتهگن.
اونینگ ایتیشیچه، هجوم جمعه دَم آلیش کونی مناسبتی بیلن طالبان نینگ محلي عملدارلری اویلریگه کېتگن پیتده صادر اېتیلگن. کامگار نینگ تأکیدلشیچه، طالبلر کوچلری واقعه جاییگه یېتیب کېلگچ، قوراللی شخصلر منطقهنی ترک اېتگن.
بوگون اېرتهلب بدخشان نینگ یفتل پایین اولسواللیگی بیر نېچه ساعت دوامیده طالبلر نظارتیدن چیقیب، ینگی تشکیل اېتیلگن «سپاهيان میهن» جبههسی کوچلری قۉلیگه اۉتگنی حقیده خبرلر ترقهلگن اېدی.
اجتماعي ترماقلرده نشر قیلینگن ویدېو و صورتلرده یفتل پایین اولسواللیگی حاکملیگی بناسی اوستیده طالبان بیراغی اۉرنیگه کۉک رنگلی بیراق هیلپیرهب تورگنی کۉرینهدی. ویدېولرده آتیشمهلر و قوراللی تۉقنهشوولر آوازی هم اېشیتیلهدی.
بیر منبعنینگ اطلاعات روزگه بېرگن معلوماتیده، «سپاهيان میهن» جبههسی اعضالری یفتل پایین اولسواللیگی اېگهلهگنی و حاضر هم طالبلر بیلن تۉقنهشوولر دوام اېتهیاتگنینی بیلدیرگن.
«سپاهيان میهن» ناملی فیس بوک صحیفهسی اعلان قیلگن بیاناتده جبهه اعضالری اۉتگن کېچهسی بدخشان ولایتی نینگ کشم، یاوان-راغ و یفتل پایین تومنلریگه بیر وقتده هجوم اویوشتیرگنی ایتیلگن.
بیاناتگه کۉره، هجوملر تونگی ساعت تخمیناً۲:۰۰ده باشلنگن. جبهه وکیللری یفتل پایین اولسواللیگی مرکزیگه اویوشتیریلگن هجوم دوامیده بیر نېچه طالبان اعضاسینی اسیر آلگنی و اولرنینگ قورال-اسلحهلرینی اۉزلری بیلن آلیب کېتگنینی دعوا قیلگن.
بونگه جوابن طالبلرنینگ بدخشاندهگی امنیه قوماندانلیگی مطبوعات سۉزلاوچیسی اوشبو حادثه یوزهسیدن یېتّی کیشی قۉلگه آلینگنینی معلوم قیلدی. اونینگ ایتیشیچه، طالبلر کوچلری گروه نینگ باشقه قرشیلیک کۉرسهتهیاتگن اعضالرینی قیدیریشنی دوام اېتتیرماقده.
اگر بو واقعهلر مستقل روشده تصدیقلنسه، سۉنگّی بېش ییل ایچیده ایلک بار طالبلرگه قرشی کوچلر بیر اولسواللیک نی بیر نېچه ساعت دوامیده نظارت آستیگه آلگن بۉلهدی.
طالبلر اۉزیگه قرشی قوراللی مخالفت موجودلیگینی انکار اېتهدی. شونگه قرهمهی، بیر نېچته قوراللی قرشیلیک جبههلری وقتی-وقتی بیلن طالبلر کوچلریگه قرشی هجوملری اویوشتیریلگنی حقیده بیانات بېریب کېلماقده.
