«سپاهيان میهن» جبههسی بدخشان ولایتینینگ یفتل پایین اولسواللیک مرکزیده اۉز بیراغینی کۉترگنیدن سۉنگ، طالبلر اوردوسی باشلیغی فصیحالدین فطرت اوشبو اولسواللیککه بارگن.
فطرت یفتل پاییندهگی طالبلر امنیه قوماندانلیگی قرارگاهیده ژورنالیستلرگه بېرگن بیاناتیده، «تیزیمگه قرشی چیقماقچی بۉلگنلر» اۉز مقصدلریگه اېریشه آلمهگنینی ایتدی.
آریانا تلویزیونی تامانیدن نشر قیلینگن ویدیوده فطرت اولسواللک مرکزیگه هجوم قیلگنلرنی «فتنهچیلر» دېب اتهدی.
اونینگ سۉزلریگه کۉره، هجوم حقیدهگی خبرنی «اېرتهلب، بامداد نمازیدن کېین» آلگن و وضعیتنی نظارت قیلیش اوچون شخصن بدخشانگه بارگن.
فطرتنینگ ادعا قیلیشیچه، هجومچیلر «مقصدلریگه اېریشه آلمهگن» و «اولرنینگ رېجهسی بیر ساعت ایچیده برباد قیلینگن».
اونینگ ایتیشیچه، یفتل پایین اولسواللیک مرکزیگه هجوم قیلگنلرنینگ اکثریتی قۉلگه آلینگن، قالگن اَیریم شخصلر اېسه قیدیرووگه بېریلگن.
طالبلرگه قرشی قوراللی گروه حسابلنگن «سپاهيان میهن» جبههسی اېسه بوگون تانگده بدخشاننینگ یفتل پایین اولسواللیک مرکزینی بیر نېچه ساعت دوامیده نظارت قیلگنینی معلوم قیلگن.
اجتماعي ترماقلرده ترقهلگن ویدیو و صورتلرده یفتل پایین اولسواللیگی حاکملیگی بناسی اوستیده طالبلر بیراغی اۉرنیگه کۉک رنگلی بیراق هیلپیرهب تورگنی کۉرینهدی. ویدیولرده قوراللی تۉقنهشوو و آتیشمهلر آوازی هم اېشیتیلهدی.
اگر بو واقعه مستقل روشده تصدیقلنسه، بو سۉنگگی بېش ییل ایچیده طالبلر مخالفلری بیر اولسواللیکنی بیر نېچه ساعت دوامیده نظارت قیلگن ایلک حالت حسابلنهدی. طالبلر اېسه هنوز اۉزیگه قرشی قوراللی مخالفت فعالیت یوریتهیاتگنینی انکار اېتیب کېلماقده.
