پاکستان حکومتی افغانستان مهاجرلریگه باسیمنی ینه-ده کوچهیتیرر اېکن، خیبر پختونخوا ایالتی رسميلری افغانستان مهاجرلرینینگ اویلرینی بوزیش بۉییچه کۉرسهتمه بېردی.
فرانسه خبرگزارلیگی خبریگه کۉره، جولای آیی دوامیده پاکستان رسميلری متانی منطقهسیده مهاجرلر یشهیدیگن کۉپلب اویلرنی بوزیب تشلهگن.
محلي جماعه اعضالری و رسميلرنینگ ایتیشیچه، اویلرنی بوزیش، شخصنی تصدیقلاوچی حجتلرنی تېکشیریش و مهاجرلرنی اویلرینی بۉشهتیشگه مجبورلش حکومتنینگ افغانستان مهاجرلرینی قَیتریش رېجهسی دایرهسیده عملگه آشیریلماقده.
۵۰ یاشلی نجیب رحماننینگ ایتیشیچه، او آتهسینینگ دارو-درمانلری و فرزندلرینینگ تعلیم حجتلرینی اوییدن آلیب چیقیشگه اورینگن، بیراق پولیس بونگه رخصت بېرمهگن.
او ویران قیلینگن اویلر قالدیقلری یانیده توریب شوندهی دېدی: «پولیس بیزنی عموماً تینگلهمهدی، فقط اوینی بوزیش کېرهکلیگینی ایتدی.»
جاري ییل جون آییده پاکستان ایچکی ایشلر وزیرلیگی مملکت بۉیلب پولیسگه ۱۰جولایدن باشلب ویزهسیز یشهیاتگن افغانستان فقرالرینی حبسگه آلیشنی بویورگن اېدی.
اسمی سِر سقلنگن پېشاوردهگی یوقاری مرتبهلی پولیس خادیمی فرانسه خبرگزارلیگیگه: «حجتسیز افغانستان یشاوچیلریگه قرشی کېنگ کۉلملی باستیریش۱۰-جولایدن باشلندی و هنوز دوام اېتماقده»دېدی.
اونینگ سۉزلریگه کۉره، فدرال حکومت انیق کۉرسهتمهلر بېریشیدن آلدین هم پولیس ایالت بۉیلب افغانستان یشاوچیلرینی رۉیخطگه آلیش ایشلرینی یکونلهگن.
پولیس و محلي رسميلر ۱۰-جولایدن آلدین افغانستان یشاوچیلرینی پاکستاننی ترک اېتیش حقیده بیر نېچه بار آگاهلنتیرگنینی اَیتماقده.
اوییدن اَیریلگن۷۰ یاشلی احمد ملا شوندهی دېدی: «پولیس هېچ کیم نینگ احوالینی انابتگه آلمهیدی. یانیمده پولیم بارمی یاکه یۉقمی، ساغلیغیم قندهی بونگه عموماً اعتبار بېرمهیدی.»
اونینگ ایتیشیچه، پولیس کمیده ییگیرمه مرته آگاهلنتیریش بېرگن، بیراق آدملرنینگ اۉزیگه خاص قیینچیلیکلری موجود.
بیرلشگن ملتلر تشکیلاتی معلوماتلریگه کۉره، ۲۰۲۳-ییلدن بویان۲.۳میلیون افغانستانلیک پاکستان تامانیدن افغانستانگه قَیتریلگن.
شو بیلن بیرگه، بیرلشگن ملتلر تشکیلاتی گزارشیگه کۉره، پاکستانده هنوز بیر میلیوندن آرتیق افغانستانلیک استقامت قیلماقده.
فرانسه خبرگزارلیگی مخبری نینگ پېشاوردن خبر بېریشیچه، شهر بۉیلب وقتینچهلیک نظارت پونکتلری تشکیل اېتیلگن بۉلیب، اولرده یۉلاوچیلرنینگ شخصي حجتلری تېکشیریلماقده.
نظارت پوستهلریدن بیریدهگی پولیس: «بیزگه حجتسیز افغانستان فقرالرینی حبسگه آلیش بۉییچه انیق کۉرسهتمهلر بېریلگن»، دېدی.
پېشاوردهگی «مینی کابل» نامی بیلن تنیلگن بازارده، مینگلب دوکانلر افغانستانلیکلرگه تېگیشلی. سوداگرلر مزاجلر سانی کېسکین کمهیگنینی اَیتماقده.
بازار تدبیرکارلریدن بیری ذبیحالله: «آدملر اویلریدن چیقمهیپتی، سودا-ساتیق دېیرلی تۉختهب قالگن»، دېدی.
پاکستان خوفسیزلیک بیلن باغلیق تهدیدلر کوچهیگنینی تأکیدلب، ۲۰۲۳ییلده حجتسیز خارجلیکلرنی چیقریب یوباریش کمپاینینی باشلهگنینی اعلان قیلگن اېدی.
پاکستان رسميلری اَیریم افغانستان فقرالری هجوملرده اشتراک اېتهیاتگنینی و افغانستان توپراغیدن ترورچی گروهلر فایدهلنهیاتگنینی دعوا قیلماقده.
جاري ییلده پاکستان افغانستان توپراغیگه هوا هجوملری هم اویوشتیریب، بونینگ مقصدی جنگری گروهلرنی نشانگه آلیش اېکنینی بیلدیرگن.
طالبلر اېسه بیر نېچه بار افغانستان توپراغیدن قوراللی گروهلر فایدهلنهیاتگنینی رد اېتیب، پاکستان هوا هجوملری عاقبتیده تینچ اهالی هلاک بۉلگنینی تأکیدلهگن.
