ایران تشقی ایشلر وزیری عباس عراقچی مملکتی «خوفسیز، برقرار، ترقي اېتگن، تروریزمدن خالی و کېنگ قمراولی حکومتگه اېگه افغانستاننی شکللنتیریشگه خدمت قیلهدیگن هر قندهی تشبثنی قۉللب-قوّتلشینی» معلوم قیلدی.
عراقچی بوگون (جمعه،۲ اسد) قیرغیزستانده بۉلیب اۉتگن شانگهای همکارلیک تشکیلاتی تشقی ایشلر وزیرلری ییغیلیشیدهگی نطقیده افغانستاندهگی وضعیت دایرهسیدهگی خوفسیزلیک و ترقیات بۉییچه اېنگ مهم عمومي مسألهلردن بیری بۉلیب قالهیاتگنینی تأکیدلهدی.
اونینگ سۉزلریگه کۉره، افغانستاندهگی برقرارلیک و خوفسیزلیک نهفقط اوشبو مملکت خلقی، بلکه بوتون منطقه اوچون استراتژیک اهمیتگه اېگه.
عراقچی تروریزم، اېکسترېمیزم، ترانسمیللي اویوشگن جنایتچیلیک، گیاهوند مادّهلر قاچاقی، ناقانوني مهاجرت و گومانیتار معمالرگه قرشی ثمرهلی کورهشیش منطقه دولتلری اۉرتهسیده، اینیقسه شانگهای همکارلیک تشکیلاتی دایرهسیده، یقین و اوزلوکسیز همکارلیکنی طلب قیلیشینی ایتدی.
ایران تشقی ایشلر وزیری، شونینگدېک، طالبلر و پاکستان اۉرتهسیدهگی کېسکینلیک همده ماجرالرگه برهم بېریشگه چقیردی.
طالبلر حاکمیتگه قَیتگنیدن بېری ایران اوشبو گروه بیلن کېنگ سیاسي و اقتصادي علاقهلرنی یۉلگه قۉیگن. بیراق تهران حاضرگچه طالبلر حکومتینی رسماً تن آلمهگنینی بیلدیریب کېلماقده و افغانستانده کېنگ قمراولی حکومت توزیلیشینی قۉللب-قوّتلشینی تأکیدلهماقده.
