«افغانستان آزادلیک جبههسی» نینگ معلوم قیلیشیچه، بدخشان ولایتینینگ زیباک اولسواللیگیده اوشبو جبهه کوچلری بیلن طالبلر اۉرتهسیده یوز بېرگن ینگی تۉقنهشووده طالبلرنینگ بېش اعضاسی هلاک بۉلگن، ینه ۱۱ نفری یرهلنگن.
جبهه اعلان قیلگن بیاناتگه کۉره، تۉقنهشوو بوگون (چهارشنبه، ۱۴-اسد) توشدن کېین باشلنگن و تۉرت ساعت دوام اېتگن.
بیاناتده ایتیلیشیچه، جنگ طالبلر کوچلرینینگ زیباکدهگی جبهه پوستهلری و مدافعه استحکاملریگه اویوشتیرگن هجوملری قَیتریلیشی آرتیدن یوز بېرگن. نتیجهده طالبان چېکینیشگه مجبور بۉلگن و تلفات کۉرگن.
جبهه نینگ تأکیدلشیچه، اوشبو تۉقنهشووده اونینگ کوچلری آرهسیده قربانلر یاکه یرهدارلر بۉلمهگن.
«افغانستان آزادلیک جبههسی» نینگ زیباک اولسواللیگیده طالبانگه قرشی هجوملری قریب ایکّی هفته اوّل باشلنگن.
جبهه هجوملر باشلنگنیدن بیر کون اۉتیب، ۲۱ نفر طالبان اعضاسی اۉلدیریلگنی و ینه ۳۵ نفری یرهلنگنی حقیده دعوا قیلگن اېدی.
طالبان اېسه زیباک اولسواللیگیدهگی دستلبکی تۉقنهشوونی تصدیقلهگن، بیراق واقعهگه عاید باشقهچه بیانات بېرگن.
طالبلرنینگ «۲۱۹-عمر ثالث فرقهسی» نینگ معلوم قیلیشیچه، جنگ زیباک اولسواللیگی نینگ «تۉپخانه» حدودیده صادر بۉلگن. اولر نینگ ادعاسیگه کۉره، پاکستان نینگ چترال ایالتیدهگی شاه سلیم حدودیدن کېلگن بېش نفر «عصیانچی» اۉلدیریلگن، قالگنلری اېسه ینه چترالگه چېکینیب کېتگن.
طالبلر حاضرچه «افغانستان آزادلیک جبههسی» بیلن زیباک اولسواللیگیده دوام اېتهیاتگن کېینگی تۉقنهشوولرنی تصدیقلهمهگن.
