بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی (فائو) نینگ آگاهلنتیریشیچه، اۉغیت نرخلرینینگ کېسکین آشیشی افغانستان نینگ ۲۰۲۷-ییلگی بوغدای حاصلیگه جدّي خوف توغدیرماقده.
(فائو) پنجشنبه (۱۵-اسد) کونی اعلان قیلگن بیاناتیده، یقین شرقدهگی بحران طفیلی جهان بازارلریده یوزهگه کېلگن اوزیلیشلر عاقبتیده اۉغیت نرخلری کېسکین کۉتریلگنینی معلوم قیلدی.
تشکیلات نینگ تأکیدلشیچه، اونومدارلیگی پست بۉلگن افغانستان توپراقلریده بوغدای یېتیشتیریش (DAP) دیآمونیوم فسفات اۉغیتلریدن یېترلی درجهده فایدهلنیشگه باغلیق. شو سببلی نرخلر نینگ آشیشی دهقانلر اوچون آغیر عاقبتلرگه آلیب کېلیشی ممکن.
(فائو) قیشکی بوغدای افغانستان نینگ اېنگ مهم آزیق-طعام اېکینی بۉلیب، مملکتدهگی کیمیاوي اۉغیتلرگه بۉلگن ییللیک طلبنینگ اوچدن ایکّی قِسمیدن آرتیغینی تشکیل اېتیشینی قید اېتدی.
تشکیلاتنینگ آگاهلنتیریشیچه، نرخلرنینگ آشیشی دهقانلرنی اۉغیت استعمالینی کمهیتیریشگه یاکه اېکین میدانلرینی قیسقرتیریشگه مجبور قیلیشی ممکن. بو اېسه حاصلدارلیک نینگ پهسهییشی، عایلهلرنینگ آزیق-طعامگه کیریش امکانیتی قیسقریشی و قرضدارلیک نینگ آرتیشیگه سبب بۉلهدی.
(فائو) معلوماتیگه کۉره، اوشبو بحران اېنگ اوّلا اقتصادي قیینچیلیکلرنی باشدن کېچیرهیاتگن عایلهلر، جملهدن عیاللر باشچیلیگیدهگی عایلهلر، قَیتیب کېلگن مهاجرلر همده آزیق-طعام خوفسیزلیگی ضعیف بۉلگن قیشلاق جماعهلریگه اېنگ کۉپ تأثیر قیلهدی.
(فائو) نینگ افغانستاندهگی نمایندهسی ریچارد ترنچارد«قورغاقچیلیک بیلن کېچگن آغیر ییلدن سۉنگ افغانستان دهقانلری یخشیراق دهقانچیلیک موسمیدن امید قیلهیاتگن اېدی. اما اۉغیت نرخلری نینگ آشیشی عیناً بونگه اېنگ کۉپ محتاج عایلهلر اوچون بو امکانیتنی یۉققه چیقرماقده.»
اونینگ قۉشیمچه قیلیشیچه: «بو تأمینات بحرانی اېمس، بلکه خرید قابلیبی انقراضی دیر. اۉغیت بازارده بار، اما کۉپلب دهقانلرنینگ اونی ساتیب آلیشگه قُربی یېتمهیپتی.»
نیمروز ولایتیدن دهقان دین محمد شوندهی دېگن: آلدین تنیش دوکاندارلر بیزگه اۉغیتنی نسیه بېریشردی. اېندی اېسه هېچ کیم قرضگه بېرمهیپتی. اگر اۉغیت ایشلهتمسهم، یېریمدن فایده کۉرمهیمن.»
ینه بیر نیمروزلیک دهقان اېسه، «عایلهم احتیاجلرینی قاپلهیمی یاکه پولیمنی اوروغ و اۉغیتگه صرفلهیمی، بیلمهیمن»، – دېدی.
(فائو) ۶۰۰ مینگ عایلهنی کود و اصلاح اېتیلگن بوغدای اوروغی و اۉغیت بیلن تأمینلش اوچون 38،3 میلیون امریکا دالری ضرورلیگینی بیلدیردی.
تشکیلات یاردملرنی خصوصي سکتور بیلن همکارلیکده مقصدلی سوبسیدیهلر آرقهلی عملگه آشیریشینی معلوم قیلدی. دستور دهقانلرنی بایمېتریک رۉیخطدن اۉتکزیش و الکترون کوپونلر تیزیمی آرقهلی ایشلهیدی. شو یۉل بیلن دهقانلر خصوصي کمپنیلر ترماغی آرقهلی اصلاح اېتیلگن اوروغ و اۉغیتنی خرید قیلیشلری ممکن بۉلهدی.
(فائو) معلوماتیگه کۉره، حاضرگچه ۱۰۰ مینگدن آرتیق دهقان دستوردن رۉیخطدن اۉتگن. اگر مبلغ سپتامبر آیی اۉرتهلریگچه اجرهتیلسه، اولر اېکیش موسمیگه قدَر ضرور اوروغ و اۉغیت بیلن تأمینلنهدی.
تشکیلات نینگ قید اېتیشیچه، تکامللشتیریلگن اوروغ، یېترلی مقداردهگی اۉغیت و زمانهوي دهقانچیلیک اصوللریدن بیرگهلیکده فایدهلنیش بوغدای حاصلدارلیگینی 32،8 فایزگچه آشیریشی ممکن.
(فائو) یکونده آگاهلنتیردیکی، خوف آستیده فقط کېلگوسی ییلگی بوغدای حاصلی اېمس، بلکه افغانستان قیشلاق خۉجهلیگیگه ییللر دوامیده کیریتیلگن اینوېستیتسيهلر، آزیق-طعام خوفسیزلیگی بارهسیدهگی نازک یوتوقلر انسان پرورلیک یاردمگه بۉلگن احتیاجنی کمهیتیریش بارهسیدهگی سعی-حرکتلر هم توریبدی.
