امریکانینگ بیرلشگن ملتلر تشکیلاتدهگی نمایندهسی اۉرینباسری تامی بروس بیرلشگن ملتلر تشکیلاتینینگ خوفسیزلیک کېنگشی نینگ تروریزمگه بغیشلنگن ییغیلیشیده افغانستاندهگی «داعش-خراسان» تهدیدی همان دوام اېتهیاتگنی و بو گروه بېقرارلیکدن فایدهلنهیاتگنینی ایتدی.
امریکا نمایندهسینینگ تأکیدلشیچه، داعش، «القاعده» و اولرگه علاقهدار گروهلرگه قرشی کورهش امریکانینگ اساسي اوستوار یۉنهلیشلریدن بیری بۉلیب قالماقده.
او شوندهی دېدی: «بو گروهلر هنوزگچه بېقرارلیکدن فایدهلنماقده. بونی ساحل منطقهسیده «القاعده» تأثیری نینگ کېنگهییشی، داعش نینگ افریقاگه تاباره کۉپراق اعتبار قرهتهیاتگنی همده افغانستانده «داعش-خراسان» تهدیدی نینگ سقلنیب قالهیاتگنی یقّال کۉرسهتماقده.»
امریکالیک دیپلومات ترورچیلیک گروهلری صنعي یۉلداش علاقه تیزیملری، یسمه آنگ، درونلر و رقملی ارزلردن تاباره کۉپراق فایدهلنهیاتگنی تهدیدلرنی ینه-ده مرکّبلشتیرهیاتگنینی بیلدیریب، بو حالت بیرلشگن ملتلر تشکیلاتیگه اعضا دولتلر و خصوصي سکتوردن ینه-ده یوقاری هوشیارلیکنی طلب قیلیشینی تأکیدلهدی.
او برچه دولتلر و بیرلشگن ملتلر تشکیلاتی نینگ تروریزمگه قرشی کورهش نینگ عملي اوستوار یۉنهلیشلریگه اعتبار قرهتیب، انیق نتیجهلرگه اېریشیشگه چقیردی.
افغانستاندهگی ترورچیلیک تهدیدی خلق ارا همجمعیت نینگ عمومي خواطرلریدن بیری بۉلیب قالماقده. شو بیلن بیرگه، طالبلر مملکتده ترورچی گروهلر موجودلیگینی رد اېتیب، افغانستان حدودی هېچ بیر دولت اوچون تهدید اېمسلیگینی تأکیدلهماقده.
طالبلر «داعش-خراسان» افغانستانده تار-مار اېتیلگنینی دعوا قیلماقده. بیراق اوشبو گروه ذمّهسیگه آلگن هجوملر مملکتده دوام اېتماقده. یقینده «داعش-خراسان» بدخشانده بیر نفر طالبلر عملدارینینگ اۉلدیریلیشی اوچون جوابگرلیکنی اۉز ذمّهسیگه آلدی.
